სარალიძის მხარდასაჭერად შექმნილმა პეტიციამ "უარს ვამბობ ნაძვის ხეზე, ვირჩევ ადამიანს" განსახილველად საჭირო, 10 000 ხმა დააგროვა. თუმცა, პეტიციის განხილვას თბილისის მერიას კანონი არ ავალდებულებს.

იმისთვის, რომ საჯარო უწყებებმა მოქალაქეების მიერ შექმნილი პეტიცია განიხილონ ის მთავრობის შექმნილ ვებგვერდზე უნდა იყოს რეგისტრირებული. On.ge-მ სცადა გარკვევა აპირებს თუ არა მერია ამ პეტიციის საკუთარი სურვილით განხილვას.

როგორც მერიის პრესსამსახურში განაცხადეს, ქალაქის მერი საზოგადოების ინტერესებიდან გამომდინარე იხელმძღვანელებს. მათი თქმით, მთავარი ნაძვის ხის განთავსების საკითხსაც კალაძე მოქალაქეებთან ერთად მიიღებს. თუმცა, მერიაში არ აკონკრეტებენ განიხილავენ თუ არა კონკრეტულად ამ პეტიციას.

შვილმკვდარი მამა, ზაზა სარალიძე, რომელიც შვილის მკვლელების დასჯას ითხოვს, რუსთაველის გამზირზე კარვის გაშლას თვეების განმავლობაში ცდილობდა, თუმცა ყველა მცდელობა პოლიციასთან დაპირისპირებით სრულდებოდა. 5 ნოემბერს მას მერიამ წერილი მისწერა. წერილში მერია ითხოვს, რომ სარალიძემ აქცია თბილისში, პარლამენტის შენობის მიმდებარე ტერიტორიის ნაცვლად სხვა ადგილზე გამართოს.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

ზაზა სარალიძისთვის კონსტიტუციური უფლების, კარვის გაშლის უფლების შეზღუდვის გამო 10 ნოემბერს აქცია გამართეს არასამთავრობო ორგანიზაციებმა. პოლიციის წინააღმდეგობის მიუხედავად, თბილისში, რუსთაველის გამზირზე, პარლამენტის შენობის წინ არასამთავრობოებმა პროტესტის ნიშნად კარვები მაინც გაშალეს.

აქციაზე პოლიციასთან შეტაკების დროს სარალიძე შეუძლოდ გახდა. ამის შემდეგ მოქალაქეებმა პეტიცია "უარს ვამბობ ნაძვის ხეზე, ვირჩევ ადამიანს!" Thepetitionsite.com-ზე შექმნეს.