პრეზიდენტი გიორგი მარგველაშვილი ხსნის, თუ რატომ შევიდა ხუთი წლის წინ "მისთვის მიუღებელი" წინამორბედის სასახლეში. მისი თქმით, ამ ჟესტმა ნათლად აჩვენა, რომ "ის არ არის ადამიანი, ვინც ემორჩილება". ამის შესახებ მან რადიო თავისუფლების ეთერში, გოგი გვახარიას გადაცემაში "ანარეკლები" ისაუბრა:

"თავიდან უარს ვამბობდი... ეს არ იყო წინასაარჩევნო დაპირება, ეს იყო ჩემი შეხედულების გაზიარება, რომ მე არ მინდა. ჩემთვის მიუღებელი იყო წინა პრეზიდენტი. ეს იყო საფუძველი. [2013 წლის საპრეზიდენტო] არჩევნების შემდეგ, ეგრევე, დღეებში, ნათლად გამოჩნდა, რომ ჩემი და მმართველი კოალიციის გზები გაყოფილია. ბევრი პერსონაჟი იყო შიგნით, მთავარი როლი ბიძინა ივანიშვილს ჰქონდა, მაგრამ დანარჩენებიც. ამ გაყოფას სჭირდებოდა პოლიტიკური სიმბოლო, რათა გამომეკვეთა ის, რომ მე არ ვარ ადამიანი, ვისაც ეტყვიან "მესტა" და სადაც ეტყვიან "მესტა" იქ დაჯდება ან დაწვება".

გიორგი მარგველაშვილი ჰყვება, რომ სასახლეში გადასვლამ მოსპო ინტერპრეტაციები და წამოვიდა აგრესია: "როგორ? ჩვენ ყველანი ვართ მორჩილებაში და შენ რა უფლება გაქვს, არ დაემორჩილო? ამ სასახლემ, იმ ნაბიჯის შემდეგ და აქ 5 წლის გატარების შემდეგ შეიძინა სიმბოლიკა, რომ აქ ასე არ არის, რომ ყველა არ დადის ერთ ჭკუაზე".