საქართველოს პრეზიდენტი, გიორგი მარგველაშვილი, გონიოში იმ ადგილას ჩავიდა, სადაც ზღვაში დაკარგულ სამხედრო მოსამსახურეებს ამ დრომდე ეძებენ. ინფორმაციას ინტერპრესნიუსი ავრცელებს.

"მძიმე წუთებია ყველა სამხედროსთვის და მოვედი, რომ თანადგომა გამოვხატო", - განაცხადა პრეზიდენტმა.

ზღვაში ორი სამხედრო მოსამსახურის, იაგო შარაძისა და გიორგი ნანიტაშვილის პოვნა კვლავ ვერ ხერხდება. მათ ამ დრომდე მყვინთავთა რამდენიმე ჯგუფი ეძებს. გონიოში საზღვაო ზოლში იმყოფებიან სამხედრო პოლიციისა და გენერალური ინსპექციის წარმომადგენლები. საქმეში ჩართულია ავიაციაც.

საქართველოს თავდაცვის სამინისტროს განცხადებით, საწვრთნელი ვარჯიშის დროს, ზღვაში სიღრმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.