ამერიკის შეერთებული შტატების პირველი ლედი მელანია ტრამპი ABC News-თან ინტერვიუში კამპანიას #მეც გამოეხმაურა და თქვა, რომ როცა ქალები ვინმეს სექსუალურ შევიწროებაში ადანაშაულებენ, ამისათვის "მყარი მტკიცებულებების არსებობაა საჭირო".

მან ინტერვიუში არ განმარტა, თუ რა სახის მტკიცებულება იგულისხმა, თუმცა თქვა, რომ ის ქალების გვერდით დგას:

"შენ უბრალოდ ვერ ეტყვი ვინმეს, "მე სექსუალურად შემავიწროვეს", ან "შენ მე ეს გამიკეთე", რადგან ზოგჯერ მედია ზედმეტად შორს მიდის იმ ისტორიების თხრობისას, რომლებიც არ შეესაბამება რეალობას. ეს არ არის სწორი".

მელანია ტრამპი გასულ კვირას აფრიკაში იმყოფებოდა. მარტო მოგზაურობისას, ის ოთხ ქვეყანას, განას, მალავის, კენიასა და ეგვიპტეს ეწვია.

კამპანია #მეც

ერთი წლის წინ, ოქტომბერში გამოცემებმა ნიუ იორკ თაიმსმა და ნიუ იორკერმა საგამომძიებლო რეპორტაჟი გამოაქვეყნეს, რომელიც ჰოლივუდის პროდიუსერის, ჰარვი უაინსტაინის მიერ რამდენიმე ქალის მიმართ ძალადობის და შევიწროების ბრალდებებს მოიცავდა.

ცნობილი პროდიუსერი, რომლის ფილმებიც ბევრჯერ იყო ნომინირებული სხვადასხვა კონკურსებზე, ქალებს კარიერულ წარმატებაში დახმარებას პირდებოდა სექსუალური კავშირის სანაცვლოდ. ბრალდების მიხედვით, მსახიობები მირა სორვინო და ეშლი ჯადი "შავ სიაში" მოხვდნენ, რადგან მათ უარი განაცხადეს უაინსტაინის მოთხოვნების შესრულებაზე.

დღეს უაინსტაინის საქმე სასამართლოშია. მას გაუპატიურების და სექსუალური ძალადობის ბრალდებებზე უწევს პასუხის გაცემა.

მას შემდეგ, რაც უაინსტაინის ისტორია საჯარო გახდა, უამრავმა ქალმა სხვადასხვა ინდუსტრიიდან დაიწყო საუბარი სექსუალური შევიწროების და ძალადობის შემთხვევებზე — ეს მოძრაობა სოციალურ ქსელ ტვიტერზეცნობილი გახდა ჰეშტეგით #მეც.

ერთი წლის შემდეგ, მოძრაობას #მეც ამერიკულ საზოგადოებაზე დიდი გავლენა აქვს სოციალურად, პოლიტიკურად თუ კერძო სექტორში.