დონეცკში მომხდარი აფეთქებისას სულ მცირე ოთხი ადამიანი დაშავდა, მათ შორისაა სეპარატისტული დონეცკის სახალხო რესპუბლიკის თავმჯდომარეობის კანდიდატი. ინფორმაციას რადიო თავისუფლება ავრცელებს.

აფეთქება 29 სექტემბერს იმ შენობაში მოხდა, სადაც ადგილობრივი კომუნისტური პარტია შეხვედრას მართავდა.

დონეცკის სეპარატისტული ადმინისტრაციის ცნობით, სწორედ ამ დროს, იგორ ხაკიმზიანოვი, კომუნისტების კანდიდატი დონეცკის სახალხო რესპუბლიკის ხელმძღვანელის პოსტზე, შენობაში შედიოდა.

სეპარატისტების ტელეგრამის არხი შემთხვევის ამსახველ ფოტომასალას აქვეყნებს.

ეს ინციდენტი ერთ-ერთი ბოლო ძალადობაა აღმოსავლეთ უკრაინაში, სადაც მოსკოვის მიერ მხარდაჭერილი სეპარატისტები 2014 წლიდან აწარმოებენ ბრძოლას უკრაინის ცენტრალური ხელისუფლების წინააღმდეგ. დაახლოებით ერთი თვის წინ, დონეცკის ერთ-ერთ კაფეში ბომბის აფეთქების შედეგად დაიღუპა ალექსანდრ ზახარჩენკო, დონეცკის თვითაღიარებული სახალხო რესპუბლიკის ლიდერი.