ინფორმაციის თავისუფლების განვითარების ინსტიტუტის (IDFI) პროგრამების დირექტორის, ლევან ავალიშვილის განცხადებით, პრემიებსა და სახელფასო დანამატებზე ახალი კანონით დაწესებული შეზღუდვების მიუხედავად, თანამდებობის პირების შრომის ანაზღაურების ოდენობაში მნიშვნელოვან ცვლილებებს არ უნდა ველოდოთ.

მისივე განმარტებით, თანამდებობის პირთა უმრავლეს შემთხვევაში, შრომის ანაზღაურების ახალი კანონის მიღების შემდეგ, ყოველთვიურ სარგოდ განესაზღვრათ დაახლოებით იგივე ოდენობის თანხა, რასაც ისინი კანონის მიღებამდე ყოველთვიურად საშუალოდ იღებდნენ, სარგოს პრემიის და დანამატის სახით.

ავალიშვილის თქმით, წლების განმავლობაში საქართველოს საჯარო დაწესებულებებში შრომის ანაზღაურების მოუწესრიგებელმა სისტემამ განაპირობა არასამართლიანი და გაუმჭვირვალე სახელფასო პოლიტიკის ჩამოყალიბება.

"სახელფასო პოლიტიკის ნაკლოვანებები კარგად ჩანს IDFI-ის მიერ შექმნილ ელექტრონულ მოდულში, სადაც ასახულია დაახლოებით 700-მდე მაღალი თანამდებობის პირის მიერ კონკრეტულ წელს მიღებული შრომის ანაზღაურების შესახებ ინფორმაცია", - აღნიშნა მან.

28 სექტემბერს, ინფორმაციის თავისუფლების განვითარების ინსტიტუტმა (IDFI) მაღალი თანამდებობის პირთა მიერ დეკლარირებული შემოსავლების ელექტრონული მოდულისა და ღია მონაცემების პლატფორმა – www.DataLab.ge-ის პრეზენტაცია გამართა. ღონისძიებაზე ასევე წარმოდგენილი იქნა თანამდებობის პირთა ანაზღაურების შესახებ კვლევის შედეგები.