ფინანსთა სამინისტროს მიერ მიღებული გადაწყვეტილებით, ავტოსატრანსპორტო საშუალებით ხორბლის და ჭვავის ფქვილის გატანა და შემოტანა აიკრძალება. უწყების ცნობით, აღნიშნული საქონლის ექსპორტი და იმპორტი მხოლოდ სარკინიგზო და საზღვაო ტრანსპორტით მოხდება. აღნიშნული გადაწყვეტილება 2019 წლის პირველი იანვრიდან ამოქმედდება.

ფინანსთა სამინისტროს ამ გადაწყვეტილებას იმპორტიორების პროტესტი მოჰყვა. მათ უკვე რამოდენიმე დღეა ლილოს გამშვებ პუნქტთან სატვირთო მანქანებით ტერმინალი "გეზ 1" აქვთ ჩახერგილი.

"ყველანაირ ფორმას მივმართავთ, გზასაც დავკეტავთ და მანქანებსაც დავწვავთ. რად მინდა ის მანქანა, რომელსაც ვერ ვამუშავებ. ამ ტერმინალშივე დავწვავთ ამ მანქანებს", — ამბობს აქციის მონაწილე თეიმურაზ ნარიმანიძე.

აღნიშნული გადაწყვეტილებით უკმაყოფილოა კიდევ ერთი იმპორტიორი გიორგი ჯიჯიშვილი. როგორც მან რუსთავი 2-თან საუბარში აღნიშნა, ხორბლის გემით და რკინიგზით შემოტანა, პურპროდუქტების ფასს გააძვირებს.

"დღეს ჯდება საშუალოდ 40 დოლარი ერთი ტონა ტვირთის შემოტანა ტრანსპორტით. ხოლო გემი და მატარებელი თუ ჩაერთო მინიმუმ 30 დოლარით გამოიწვევს გაძვირებას ერთი ტონის", — ამბობს გიორგი ჯიჯიშვილი.

ლილოს გამშვებ პუნქტთან შეკრებილი აქციის მონაწილეებიდან ერთ-ერთმა პროტესტის გამოხატვის უკიდურეს ფორმას მიმართა. როგორც შინაგან საქმეთა სამინისტროში On.ge-ს განუცხადეს, აქციის მონაწილე შენობის სახურავზეა ასული და თვითდაზიანებით იმუქრება. აქციის მონაწილე ფინანსთა მინისტრთან შეხვედრას და უწყების მიერ მიღებული გადაწყვეტილების გაუქმებას ითხოვს.

გუშინ, 19 სექტემბერს ფინანსთა სამინისტროს მიერ გამოქვეყნებულ განცხადებაში ეწერა, რომ უწყება მზადაა იმპორტიორებთან მოლაპარაკებისთვის.

"ვფიქრობთ, პირველ იანვრამდე საკმარისი დროა იმისთვის, რომ დავძლიოთ ეს საკითხი და მოვძებნოთ ყველასთვის უმტკივნეულო და მისაღები ვარიანტი", — წერია განცხადებაში.

ფინანსთა მინისტრის თქმით, იმპორტიორების გარეშე არცერთი გადაწყვეტილება არ იქნება მიღებული.