თბილისის საქალაქო სასამართლომ ტერორიზმის საქმეზე, საბრძოლო მასალის შეძენა-შენახვისთვის ბრალდებულს აღკვეთის ღონისძიების სახედ პატიმრობა შეუფარდა.

საქმის მასალების თანახმად, ბრალდებული თბილისში, წყნეთის სატყეო უბანში, ერთ-ერთ ქუჩაზე მდებარე სახლში, დაცვის თანამშრომელად მუშაობდა. პროკურატურის ვერსიით, მან დაუდგენელ დროსა და ვითარებაში მართლსაწინააღმდეგოდ შეიძინა და ინახავდა საბრძოლო ვაზნებს მისსავე სამსახურეობრივ ოთახში.

საქმის მასალებით, რომელსაც საქალაქო სასამართლო ავრცელებს, 4 ივლისს ბრალდებულის სამუშაო ოთახში განთავსებული კომპიუტერის მაგიდის უჯრიდან ამოიღეს შავ კოლოფში მოთავსებული ხუთი ცალი ვაზნის ფორმის ობიექტი. ბალისტიკური და პიროტექნიკური ექსპერტიზის დასკვნის თანახმად, 5 ცალი ვაზნის ფორმის მქონე ობიექტიდან, სამი მათგანი მიეკუთვნება საბრძოლო მასალათა კატეგორიას და ვარგისია გამოსაყენებლად.

ბრალდების მხარის მტკიცებით, ჩხრეკისას ამოიღეს მობილური ტელეფონი, მეხსიერების ბარათი, კომპიუტერი, ე.წ. ისლამური სახელმწიფოს დროშები და სხვა ნივთები, რაც დაკავშირებულია ისლამურ სახელმწიფოსთან.

ბრალდებულის დაკავების შესახებ ინფორმაცია სახელმწიფო უსაფრთხოების სამსახურმა დღეს, 6 აგვისტრს გაავრცელა.