საქართველოში ევროკავშირის ელჩი იანოშ ჰერმანი აღნიშნულ თანამდებობაზე მუშაობას ასრულებს. საგარეო საქმეთა მინისტრმა დავით ზალკალიანმა იანოშ ჰერმანთან გამოსამშვიდობებელი შეხვედრა უკვე გამართა გამართა.

საგარეო საქმეთა სამინისტროს ინფორმაციით, შეხვედრაზე ყურადღება გამახვილდა იმ წარმატებებზე და პროგრესზე, რასაც საქართველომ ევროინტეგრაციის მიმართულებით ბოლო წლების განმავლობაში მიაღწია.

განსაკუთრებული ყურადღება დაეთმო ევროკავშირსა და საქართველოს შორის ასოცირების შეთანხმების ხელმოწერასა და ამოქმედებას, ევროკავშირთან უვიზო მიმოსვლის ძალაში შესვლას, ევროკავშირის ენერგეტიკულ გაერთიანებაში ქვეყნის გაწევრიანებას, საქართველო-ევროკავშირის უსაფრთხოების საკითხებზე მაღალი დონის სტრატეგიული დიალოგის დაწყებას, და ასევე ევროკავშირის მიერ საქართველოსადმი გაწეული დახმარების მნიშვნელობას.

"კიდევ ერთხელ აღინიშნა საქართველოს, როგორც ევროკავშირის მნიშვნელოვანი პარტნიორის და "აღმოსავლეთ პარტნიორობის ფორმატში" წარმატებული და ლიდერი ქვეყნის როლი", - ნათქვამია საგარეო საქმეთა სამინისტროს განცხადებაში.

იანოშ ჰერმანი საქართველოში ევროკავშირის ელჩის თანამდებობას 2014 წლიდან იკავებს.