ცხრა არასამთავრობო ორგანიზაცია აცხადებს, რომ უზენაესი სასამართლოს თავმჯდომარის, ნინო გვენეტაძის გადადგომა ბევრ კითხვას აჩენს. როგორც მათ განცხადებაში წერია, მიუხედავად იმისა, რომ გვენეტაძე საკმარისად არ რეაგირებდა სისტემაში არსებულ პრობლემებზე, ცხადი იყო მასსა და მოსამართლეთა გავლენიანი ჯგუფის წარმომადგენლებს შორის არსებული დაპირისპირება.

არასამთავრობოები მოუწოდებენ პრეზიდენტს, დროულად დაასახელოს და დანიშნოს აღნიშნულ პოზიციაზე ისეთი კანდიდატი, რომელიც "ობიექტურად აფასებს" სასამართლო ხელისუფლებაში არსებულ ვითარებას და გადადგამს პრინციპულ ნაბიჯებს.

"საკონსტიტუციო ცვლილებების ძალაში შესვლამდე, რომელიც ახალი პრეზიდენტის ფიცის დადების მომენტიდან უნდა ამოქმედდეს, უზენაესი სასამართლოს თავმჯდომარეობის კანდიდატს საქართველოს პრეზიდენტი წარადგენს, ხოლო მას თანამდებობაზე პარლამენტი ნიშნავს. ცვლილებების ამოქმედების შემდეგ კანდიდატის წარდგენის უფლებამოსილება იუსტიციის უმაღლესი საბჭოს კომპეტენცია გახდება, რაც მნიშვნელოვნად გაზრდის სისტემაში არსებული გავლენიანი მოსამართლეების ხელში ძალთა კონცენტრაციისა და სისტემის კიდევ უფრო ჩაკეტილობის რისკებს", - წერია განცხადებაში.

უზენაესი სასამართლოს თავმჯდომარე ნინო გვენეტაძე დღეს, 2 აგვისტოს გადადგა. როგორც უზენაესი სასამართლოს განცხადებაშია ნათქვამი, მისი გადადგომა ჯანმრთელობის მდგომარეობას უკავშირდება, რომელიც საზღვარგარეთ რამდენიმეთვიან მკურნალობას მოითხოვს.

განცხადების ხელს აწერენ:

  • ადამიანის უფლებების სწავლებისა და მონიტორინგის ცენტრი (EMC)
  • საერთაშორისო გამჭვირვალობა - საქართველო
  • საქართველოს დემოკრატიული ინიციატივა (GDI)
  • საქართველოს ახალგაზრდა იურისტთა ასოციაცია (GYLA)
  • კონსტიტუციის 42-ე მუხლი
  • ადამიანის უფლებათა ცენტრი (HRC)
  • პარტნიორობა ადამიანის უფლებებისთვის (PHR)
  • ინფორმაციის თავისუფლების განვითარების ინსტიტუტი (IDFI)
  • სამართლიანი არჩევნებისა და დემოკრატიის საერთაშორისო საზოგადოება (ISFED)