საქართველოს ოფიციალური ვიზიტით, სავარაუდოდ, გერმანიის კანცლერი ანგელა მერკელი ეწვევა. კანცლერის საქართველოში ჩამოსვლის შესახებ ინფორმაცია პირველმა არხმა გაავრცელა.

On.ge-ს ინფორმაციის გადასამოწმებლად საქართველოს პარლამენტის საგარეო ურთიერთობათა კომიტეტის თავმჯდომარეს სოფიო ქაცარავას დაუკავშირდა. მისი თქმით, ანგელა მერკელი საქართველოში სავარაუდოდ, აგვისტოს ბოლოს ჩამოვა. დეპუტატმა განმარტა, რომ ინფორმაციის გავრცელების დროს ადგილობრივ მედიას დაეყრდნო.

On.ge-მ ინფორმაციის გადამოწმევა საქართველოს საგარეო საქმეთა სამინისტროშიც სცადა, თუმცა უწყებაში ჩვენს ზარებს ჯერჯერობით არ პასუხობენ.

შესწორება: ნიუსის თავდაპირველ ვერსიაში ანგელა მერკელის საქართველოში ვიზიტის შესახებ ინფორმაცია მტკიცებითი ფორმით იყო წარმოდგენილი. ინფორმაციის გამოქვეყნების შემდეგ დეპუტატი სოფიო ქაცარავა დაგვიკავშირდა. მან დააზუსტა, რომ ინფორმაციის გავრცელების დროს ადგილობრივ მედიას დაეყრდნო და ვიზიტის შესახებ ინფორმაციას ოფიციალურად ვერ დაადასტურებს.