ლექსი კომოუ-დრისდელი 9 წლისაა და კანადაში ცხოვრობს. მას ცერებრალური დამბლა აქვს, რის გამოც სიარული და საუბარი არ შეუძლია. თუმცა როცა მისი ერთი წლის ძმა აუზში ჩავარდა, მან მისი გადარჩენა მაინც შეძლო.

ლექსის დაბადების დღეზე, მთელი ოჯახი სამზადისში იყო და რამდენიმე წუთით ერთი წლის ლილანდი ყველას ყურადღების მიღმა დარჩა. ეზოში სეირნობის დროს, პატარა ბიჭი აუზს მიადგა და მასში ჩახტა.

შეიძლება დიდებმა ვერა, მაგრამ 9 წლის გოგომ მაშინვე შენიშნა მომხდარი და იმ წამსვე გაიაზრა მოსალოდნელი შედეგები. მისი მდგომარეობიდან გამომდინარე, რომელიც ტვინის განვითარებისას მომხდარ დაზიანებას მოჰყვა, ლექსის ძმისკენ გაქცევას ან საშველად ვინმეს დაძახებას ვერ შეძლებდა, ამიტომ გააკეთა ის, რაც იმ წამს შეეძლო — მან ბოლო ხმაზე ყვირილი ატეხა, რომ უფროსების ყურადღება მიეპყრო.

"მაღლა ვიყავი და წვეულებისთვის ტანსაცმელს ვიცვლიდი, მამა უფროსი ძმის მოსაყვანად იყო წასული და ბებია სამზარეულოში საქმიანობდა. სწორედ ამ დროს გავიგე ლექსის კივილი და პანიკაში ჩავვარდი. ვიფიქრე, რომ სკამიდან გადმოვარდა", - ამბობს ბავშვების დედა.

ბებია ყველაზე სწრაფი აღმოჩნდა და ლექსისკენ გაიქცა, მან შენიშნა, რომ ლილანდი მის გარშემო არ იყო, გოგო კი აუზისკენ იშვერდა თითს და კივილს აგრძელებდა. ბებიას რამდენიმე წამი დასჭირდა პატარა ბიჭის გადასარჩენად.

ლილანდს საავადმყოფოში წაყვანამდე პირველადი დახმარება აღმოუჩინეს.

"2 წამს ცხოვრებაში ყველაფრის შეცვლა შეუძლია, საბედნიეროდ ლექსიმ დროულად მიიღო ზომები და დასახმარებლად გვიხმო", - ამბობს ბავშვების დედა.

ინციდენტი 5 მაისს მოხდა, 4 ივლისს კი პატარა გოგო ქალაქის საბჭომ გმირის წოდებით დააჯილდოვა. მას საპატიო ჯილდო ქალაქის პოლიციამაც გადასცა.

"გმირი ნებისმიერი ასაკის ადამიანი შეიძლება იყოს. პატივი მაქვს, ახალგაზრდა ლექსი დავაჯილდოვო, რადგან მან პატარა ძმის გადასარჩენად დედის გაფრთხილება შეძლო", - დაწერა ტვიტერზე ქალაქის მერმა.

"ზოგი ადამიანი ფიქრობს, რომ რადგან ჩემს შვილს სიარულისა და ლაპარაკის შესაძლებლობა შეზღუდული აქვს, მას სხვა რამეების გაკეთება არ შეიძლიათ. მაგალითად ფიქრი, გადაწყვეტილების მიღება ან სიტუაციის გააზრება, ეს კი ასე არაა. ლექსი ძალიან ჭკვიანი გოგოა", - ამბობს პატარა გმირის დედა.