დღეს, 4 ივლისს თბილისის საქალაქო სასამართლოს მოსამართლემ არასრულწლოვანთა შრომითი ექსპლუატაციის საქმეზე დაკავებულ ცოლ-ქმარს აღკვეთი ღონისძიების სახით პატიმრობა შეუფარდა.

შსს-ს ინფორმაციით, ცოლ-ქმარი არასრულწლოვნებს სხვადასხვა ადგილზე მოწყალების მოთხოვნას აიძულებდნენ.

წარდგენილი ბრალდების თანახმად, ბრალდებულებმა ჩაიდინეს არასრულწლოვნებით ვაჭრობა (ტრეფიკინგი).

საქმის მასალების თანახმად, ბრალდებულებმა ექსპლუატაციის მიზნით, 2015 წლიდან გადაიბირეს მათთან ერთად მცხოვრები და მათზე მატერიალურად და სხვაგვარად დამოკიდებული ბრალდებულ პ.მ.-ს არასრულწლოვანი 7 წლის შვილები. მათ სიცოცხლისა და ჯანმრთელობისათვის საშიში ძალადობის მუქარით, ანტისაზოგადოებრივ საქმიანობაში ჩაბმით (მოწყალების მიღების თხოვნით), უწევდნენ შრომით ექსპლუატაციას. ბრალდებულები, მოწყალების თხოვნის შედეგად შეგროვებულ თანხებს მთლიანად ისაკუთრებდნენ.

სასამართლომ ბრალდებულთა მიმართ აღკვეთის ღონისძიების შეფარდების საკითხზე დახურულ სხდომაზე იმსჯელა.

ბრალდებულებს, ბრალად ედებათ ადამიანის უფლებებისა და თავისუფლებების წინააღმდეგ მიმართული განსაკუთრებით მძიმე კატეგორიის დანაშაულების შესაძლო ჩადენა, რომელიც სასჯელის სახედ ითვალისწინებს 17-20 წლამდე ან უვადო თავისუფლების აღკვეთას.