ზაზა სარალიძის მხარდასაჭერად 3 ივლისს აქცია გაიმართება. მხარდამჭერები შვიდ საათზე შინაგან საქმეთა სამინისტროსთან შეიკრიბებიან, სადაც ხორავას ქუჩაზე მოკლული არასრულწლოვნის მამა პროტესტის ნიშნად იმყოფება.

"რამდენიმე თვეა ის უშედეგოდ იბრძვის სამართლიანობისთვის. რამდენიმე დღეა საჯაროდ ვისმენთ საქმის გამომძიებელთა არაკეთილსინდისიერ, არაპროფესიულ, ხშირად უსინდისო პასუხებს მის სამართლიან შეკითხვებზე.

ნუ დავტოვებთ მას მარტოს სისტემის ყრუ რკინის კედელთან!" წერია აქციის ივენთზე, სადაც მხარდამჭერებს შეკრებისკენ მოუწოდებენ.

როგორც ზაზა სარალიძემ On.ge-ს განუცხადა ის შინაგან საქმეთა სამინისტროს ეზოში დარჩება, სანამ მისი შველის მკვლელებს არ დაიჭერენ. სარალიძის თქმით, მას არავინ შეხვედრია და არც ტერიტორიის დატოვება მოუთხოვიათ.

"აქ ვიქნები, სანამ კალანდიას არ დააკავებენ", - საპროტესტო აქცია სარალიძემ კრიმინალური პოლიციის ხელმძღვანელთან შეხვედრის შემდეგ გადაწყვიტა.

"კრიმპოლის დირექტორს შევხვდი, რომელიც ისევე მიმტკიცებს, რომ მტკიცებულებები არ არსებობს და ვერ დავიჭერთ კალანდიასო, რომელიც არსებობს უკვე და ხელის დაფარება უნდათ", - განაცხადა სარალიძემ.

მისივე თქმით, შინაგან საქმეთა მინისტრიც კრიმინალური პოლიციის ხელმძღვანელის პოზიციაზეა და სარალიძის მიერ მიცემული 1-თვიანი ვადის დარღვევის მიზანი საქმის გაყალბებაა.

დღეს, 2 ივლისს პარლამენტის საგამოძიებო კომისიამ შინაგან საქმეთა სამინისტროს რეკომენდაციით მიმართა ხორავას საქმის ფიგურანტის, მიხეილ კალანდიას წინააღმდეგ სისხლისსამართლებრივი დევნის დაწყების შესახებ. კომისიაში მიიჩნიათ, რომ შესაძლოა რომ კალანდია დავით სარალიძის ჯგუფურად მკვლელობის თანამონაწილეა.

გაიგეთ მეტი: