პარლამენტის საგამოძიებო კომისიის წევრი მამუკა მდინარაძე აცხადებს, რომ გამომძიებელმა, კახა სირაძემ კითხვებს ამომწურავად ვერ უპასუხა, რადგან ამ საქმეზე ინფორმაცია არ აქვს. მდინარაძე აცხადებს, რომ კომისიის ოპოზიციონერმა წევრებმა ის სპეციალურად შეარჩიეს. ამის შესახებ მან გადაცემა არჩევანში ისაუბრა.

"ბევრ კითხვაზე პასუხი ვერ გასცა, მაგრამ ამას მეორე მხარეც აქვს ამავდროულად. ანუ საქმე რაშია, როდესაც ჩვენ დავაყენეთ საკითხი, რომ მოდი, დავკითხოთ უშუალოდ ის ადამიანი, ვინც იძიებდა საქმეს და ეს არ შესრულდა. ჩვენმა ოპონენტებმა, კომისიის უმრავლესობაში მყოფმა ადამიანებმა ჩვენი ეს მოთხოვნა არ დააკმაყოფილეს და, თუ ხელმძღვანელზეა საუბარი, მაშინ ქალაქის სამმართველოს უფროსი დავკითხოთ პირდაპირ.

აღმოჩნდა, რომ ისინი, ალბათ, ფლობდნენ ინფორმაციას, რომ ეს ადამიანი ელემენტარულად იმის საშუალებასაც მოკლებულია, რომ მოწმე გამოკითხოს, მას შეხება ვერ ექნებოდა ამ არასრულწლოვან პირებთან იმის გამო, რომ ელემენტარულად, მას ჩაბარებული არ აქვს შესაბამისი გამოცდა, შესაბამისი კურსები არა აქვს გავლილი და არ არის კომპეტენტური ამ საკითხში. ანუ, ჩვენ ორი დღის განმავლობაში ვკითხავდით არაკომპეტენტურ ადამიანს", - განაცხადა მდინარაძემ.

მისი თქმით, ჯერ დაკითხვები არ დასრულებულა, ამიტომ ნაჩქარევი გადაწყეტილებები არ უნდა მიიღონ და ადრეა დასკვნების გამოტანა ან ხარვეზებზე საუბარი.

პარლამენტის საგამოძიებო კომიტეტის სხდომაზე პოლიციის დეპარტამენტის დეტექტივების სამმართველოს უფროსმა, კახაბერ სირაძემ განაცხადა, რომ მას არასრულწლოვანთა მართმსაჯულების პრაქტიკა არ აქვს და საქმის ფიგურანტები არ დაუკითხავს. სირაძემ განაცხადა, რომ საქმის მიმდინარეობის შესახებ ინფორმაცია ჰქონდა, მაგრამ კომისიის წევრების მიერ დასმულ კითხვათა ნაწილზე პასუხი არ ჰქონდა.

ამავე თემაზე: