გირჩის ლიდერისა და საპრეზიდენტო კანდიდატის, ზურა ჯაფარიძის თქმით, საპატრიარქოს უნდა ესმოდეს, რომ მათი სარჩელი მარიხუანის მოხმარების ლეგალიზაციასთან დაკავშირებით ეხება კონსტიტუციას და არა ბიბლიურ ტექსტს.

"ეს არ ეხება ბიბლიურ ტექსტს, სადაც საპატრიარქოს შეუძლია გააკეთოს გარკვეული ინტერპრეტაციები იმიტომ, რომ ეს მათი კომპეტენციაა. კონსტიტუციის ტექსტების ინტერპრეტაციის უკანასკნელი ინსტანცია ამ ქვეყანაში საკონსტიტუციო სასამართლოა და ჩვენ სარჩელი სწორედ იქ გვაქვს შეტანილი", - განაცხადა ჯაფარიძემ.

საქართველოს მართლმადიდებლური ეკლესიის სინოდისთვის მარიხუანის 70 გრამამდე ფლობის შემთხვევაში ადმინისტრაციული სასჯელის გაუქმება მიუღებელია.

ზურა ჯაფარიძის თქმით, თუ საპატრიარქოს წარმომადგენელს სურს ამ საკითხთან დაკავშირებით დებატები, ის ამისთვის მზადაა.

"ისევე როგორც ამ ქვეყნის ნებისმიერ მოქალაქეს ან ინსტიტუტს აქვს სრული უფლება საკუთარი აზრი გამოთქვას ნებისმიერ საკითხთან მიმართებაში, იმ შემთხვევაშიც თუ ეს აზრი არის ისეთი ფუნდამენტურად მცდარი და აცდენილი, როგორც ეს კონკრეტულად მარიხუანასთან მიმართებაში მათ მიერ დაფიქსირებული პოზიციაა სინოდის სხდომის შემდეგ გაკეთებულ განცხადებაში", - განაცხადა ჯაფარიძემ.

გაიგეთ მეტი: