საქართველოს პრემიერ-მინისტრის, გიორგი კვირიკაშვილის გადადგომას საერთაშორისო მედია ეხმაურება.

"პრემიერ-მინისტრი გადადგა, მმართველი პარტიის დამფუძნებელთან ბიძინა ივანიშვილთან უთანხმოების გამო, რომელიც ყოფილი საბჭოთა კავშირის ქვეყნებში ყველაზე მდიდარი კაცია", - წერს The New York Times.

დოიჩე ველე კი გიორგი კვირიკაშვილისა და მისი გუნდის მიმართ პოლიტიკურ წრეებში არსებულ უთანხმოებაზე ამახვილებს ყურადღებას და პარლამენტთან მიმდინარე საპროტესტო აქციის შესახებ საუბრობს.

გამოცემა The New York Times-ის მსგავსად წერს, რომ კვირიკაშვილმა გადადგომის გადაწყვეტილება ბიძინა ივანიშვილთან უთანხმოების გამო მიიღო.

"ახლა ივანიშვილზე და მის გუნდზეა დამოკიდებული, როგორ დააკომპლექტებს მთავრობის ახალ კაბინეტს", - წერს დოიჩე ველე.

კვირიკაშვილის გადადგომის შესახებ გავლენიანმა ამერიკულმა სადაზვერვო-ანალიტიკურმა კომპანიამ, StartFor-მა განცხადება გაავრცელა, სადაც წერია, რომ პრემიერმა კვირიკაშვილმა გადადგომის შესახებ ხელისუფლების საწინააღმდეგო აქციების შემდეგ განაცხადა.

რა ხდება პრემიერ-მინისტრის გადადგომის შემდეგ

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს