საქართველოში ამერიკის შეერთებული შტატების საგანგებო და სრულუფლებიანი ელჩის მოადგილე, ელიზაბეთ რუდი, სირიის მიერ საქართველოს ოკუპირებული ტერიტორიების დამოუკიდებლობის აღიარებას ეხმაურება და აცხადებს, რომ ეს საქართველოს მთლიანობისა და სუვერენიტეტის დარღვევაა.

ელიზაბეთ რუდი სახელმწიფოებს, რომლებმაც ოკუპირებული სამხრეთ ოსეთი და აფხაზეთი დამოუკიდებელ სახელმწიფოებად აღიარა, მოუწოდებს, რომ აღიარების გადაწყვეტილება გააუქმონ.

ელიზაბეთ რუდი ასევე აცხადებს, რომ აშშ-ის მხრიდან ამ გადაწყვეტილებას რეაგირება მოყვება.

„აშშ მოუწოდებს სირიას, რუსეთს, ნიკარაგუას, ვენესუელას და ნაურუს, გააუქმონ ამ ტერიტორიების ე.წ. დამოუკიდებელ რესპუბლიკებად აღიარება. მინდა, აღვნიშნო, რომ აშშ-ის მხრიდან აუცილებლად მოჰყვება შედეგი იმ ქვეყნებისთვის, რომლებიც მსგავს გადაწყვეტილებას მიიღებენ", - აცხადებს ელიზაბეთ რუდი.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. საქართველომ კი პასუხად სირიასთან დიპლომატიური ურთიერთობა გაწყვიტა.