საქართველოს საგარეო საქმეთა მინისტრის მიხეილ ჯანელიძის განცხადებით, ქართული დიასპორის დღისადმი მიძღვნილი ფორუმი მიზნად ისახავს უცხოეთში მცხოვრებ თანამემამულეებთან კავშირების გაღრმავებას და დიასპორული ორგანიზაციების მხარდასაჭერად ეფექტური გზების ძიებას.

მინისტრმა საკუთარ გამოსვლაში საკონსტიტუციო ფორმით დიასპორასთან ურთიერთობების დარეგულირების კუთხით გადადგმულ ნაბიჯებზე გაამახვილა ყურადღება. მათ შორის, აღნიშნა, რომ განისაზღვრა დიასპორასთან ურთიერთობის სტატუსი, რომელიც პირველად აისახა კონსტიტუციაში.

მინისტრის თქმით, აღნიშნული ხაზს უსვამს ქვეყნის პოლიტიკურ ინტერესს, რომ გაძლიერდეს ურთიერთობები ჩვენი დიასპორის წარმომადგენლებთან.

მინისტრმა ასევე ყურადღება გაამახვილა სახელმწიფოს მიერ დიასპორის წარმომადგენლების მიერ სამშობლოს განვითარებაში შეტანილი წვლილის დაფასების მიზნით, მიგრაციის პოლიტიკის განვითარების საერთაშორისო ცენტრთან მჭიდრო თანამშრომლობაზე.

“მნიშვნელოვანია დიდი ყურადღება დავუთმოთ იმ ადამიანებს, ვისაც დიდი წვლილი შეაქვთ საქართველოს სახელის გაძლიერებაში. თითოეულ თქვენთაგანს ძალიან დიდი როლი აქვს იმისათვის, რომ საქართველომ მსოფლიოს ასპარეზზე დაიმკვიდროს ადგილი, როგორც ღირსეულმა ქვეყანამ. ჩვენ გვყავს ძალიან ბევრი წარმატებული დიასპორელი. ჩვენი ახალი სახელმწიფოსთვის თითოეული თქვენი წარმატებული ნაბიჯი არის ძალიან დიდი ღირებულების მატარებელი.ჩვენი სურვილია, რომ მაქსიმალურად ხელი შევუწყოთ თქვენს წარმატებას, თქვენს ადგილსამყოფელ ქვეყნებში და მსოფლიო მაშტაბით.ეს არის ჩვენი ერთ-ერთი უმთავრესი პრიორიტეტი” - განაცხადა მინისტრმა.

მიხეილ ჯანელიძემ აღნიშნა, რომ მნიშვნელოვანი ნაბიჯები იდგმება საზღვარგარეთ ქართული ენის ცოდნის გასაძლიერებლად.

საგარეო უწყების ხელმძღვანელმა ხაზი გაუსვა ახალ ინიციატივას, რომლითაც საზღვარგარეთ ქართველი სტუდენტებს მიეცემათ საშუალება საქართველოს საჯარო სამსახურში კონკურსში ელექტრონული კომუნიკაციის საშუალებით მიიღონ მონაწილეობა.