თბილისის მერი, კახა კალაძე ამბობს, რომ თბილისის მეტროს მემანქანეებს ხელფასის გაზრდასთან დაკავშირებით "არასწორი მოთხოვნები აქვთ". ამის შესახებ მერმა დღეს, 23 მაისს განაცხადა.

"ამ ეტაპზე არც კომპანიას და არც დედაქალაქის მერიას არა აქვს არანაირი შესაძლებლობა, რომ ხელფასები, რომელიც 1 400-დან 2 000 ლარამდე მერყეობს, მათი 45 პროცენტით გაზრდა შეუძლებელია... გაფიცვასაც თავისი წესი აქვს, რომელიც კანონით არის გაწერილი. ჩვენ ვაპირებთ, ზოგადად, გავასაჩივროთ სასამართლოში მათი მოთხოვნა. არასწორი მოთხოვნებია მათი მხრიდან წამოყენებული", - განაცხადა კახა კალაძემ.

მემანქანეთა გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში"