პრეზერვატივების კომპანია აიისას კანონიერმა წარმომადგენელმა გიორგი მშვენიერაძემ On.ge-სთან საუბარში სასამართლოს გადაწყვეტილება შეაფასა და თქვა, რომ სასამართლო საერთოდ არაფერს ამბობს, რატომ იყო რაიმე სახის დარღვევა, ან რატომ შეურაცხყოფდა კანონში ჩამოთვლილ საფუძვლებს აღნიშნული გამოხატვა:

"ის მხოლოდ აღწერს, თუ რა არის გამოსახული ფოტოზე და რატომ არის ეს ნიშნები ან სიმბოლოები დაკავშირებული მისივე შეფასებით, საქართველოს ისტორიასთან ან ამა თუ იმ რელიგიასთან. ამავდროულად, არ მსჯელობს და გაჰყავს მსჯელობის მიღმა კონსტიტუციური სტანდარტი, რომელიც კრძალავს მორალური მოტივებით გამოხატვის თავისუფლების შეზღუდვას".

თბილისის საქალაქო სასამართლომ მიიჩნია, რომ პრეზერვატივების ქართული ბრენდი აიისა მართლმადიდებელი ეკლესიის მრევლის რელიგიურ გრძნობებს ლახავს. სასამართლომ კომპანია 500 ლარით დააჯარიმა და პროდუქციის ამოსაღებად ერთკვირიანი ვადა მისცა.

სასამართლომ იმსჯელა აიისას ოთხი სახეობის შეფუთვაზე: "ჩამოვკრავდი, მარა ნათლისღებაა", "ძლევაჲ საკვირველი", "სამეფო კარი თამარში" და ორთითზეწამოცმული პრეზერვატივი, იგივე "მაკურთხებელი ხელი".