საპარლამენტო უმრავლესობა პრეზიდენტს დებატებში იწვევს. ამის შესახებ ჟურნალისტებს უმრავლესობის დეპუტატმა გია ვოლსკიმ განუცხადა.

2 მაისს პრეზიდენტი გიორგი მარგველაშვილი კანონმდებლებს ბოლო ანგარიშს წარუდგენს, რის შემდეგაც დებატები გაიმართება.

"რატომღაც ჩვენმა ოპონენტებმა, რომლებიც პოლიტიკურ დებატებს ითხოვდნენ, რატომღაც ჯერ ჯერობით თავი შეიკავეს, თუმცა მე ვფიქრობ, რომ უნდა იყოს პოლიტიკური დებატები, ბევრი გამოსვლები, მოსაზრებების გაცვლა-გამოცვლა და მთავრობაც იქ უნდა იყოს“,- აცხადებს პარლამენტის თავმჯდომარის მოადგილე გია ვოლსკი.

საპარლამენტო ოპოზიციაში დებატების გამართვის მომხრეები არიან.

ოპოზიციას უკვირს, რომ 2013 წლის შემდეგ საპარლამენტო უმრავლესობას პირველად გაუჩნდა სურვილი პრეზიდენტის ანგარიშის მოსმენის შემდეგ დებატები გაიმართოს.

"დებატებთან დაკავშირებით უმრავლესობის წევრებმა პირველად გამოიჩინეს თავი ეს დებატები უნდა იყოს. წლების განმავლობაში მოვითხოვთ და რადგან დათანხმდნენ ეს ნორმალურია", - განაცხადა სერგო რატიანმა.

პრეზიდენტის საპარლამენტო მდივნის ანა ნაცვლიშვილის თქმით, პრეზიდენტს მუდმივად ჰქონდა მზაობა დებატებისთვის და წელსაც მიესალმებიან ამ ინიციატივას.