NDI-ს გამოიკვლია მოსახლეობის მოსაზრებები, საქართველოს ნატოში გაწევრიანებასთან დაკავშირებით.

მოსახლეობის 72 პროცენტს მიაჩნია, რომ თუ საქართველო ნატოში გაწევრიანდა რუსეთის მხრიდან აგრესია გაიზრდება. ამ მოსაზრებას არ ეთანხმება 14 პროცენტი.

72 პროცენტის მოსაზრებით, ალიანსში გაწევრიანება საქართველოში უცხოური სამხედრო ბაზების ზრდას შეუწყობს ხელს. მოსაზრებას არ იზიარებს 10 პროცენტი.

თუ საქართველო ნატოს წევრი გახდება, ეს ქვეყნის ტერიტორიული მთლიანობის აღდგენას ხელს შეუწყობს - ამ მოსაზრებას მოსახლეობის 46 პროცენტი იზიარებს, ხოლო 31 არ ეთანხმება.

45 პროცენტს მიაჩნია, რომ ალიანსში გაწევრიანებით, საქართვლოში მეტი სამუშაო ადგილი გაჩნდება.

ფოტო: NDI

NDI-მ 20 მარტი - 4 აპრილის პერიოდში საქართველოს მასშტაბით წარმომადგელობითი შერჩევის საფუძველზე 2 194 ადამიანი შეირჩა (გამოპასუხება 46%). კვლევა პირისპირ ინტერვიუს სახით ჩატარდა და მისი ცდომილება 2,2 პროცენტია. კვლევა დიდი ბრიტანეთის მთავრობის UK aid-ის ფინანსური ხელშეწყობით ჩატარდა, საველე სამუშაოები კი CRRC-საქართველომ შეასრულა.