კასპის რაიონში, სოფელ ფერმაში ოჯახი დააყაჩაღეს. როგორც შინაგან საქმეთა სამინისტროში ამბობენ, პირველადი ინფორმაციით, წაღებულია ფული და ძვირფასეულობა.

უწყების პრესსამსახურში On.ge-ს განუცხადეს, რომ ყაჩაღობის დროს სახლში ოჯახის სამი წევრი იყო, რომელთაგანაც ორს ნიღბიანებმა ფიზიკური შეურაცხყოფა მიაყენეს.

"სამი კაცი დაგვესხა თავს ნიღბებით. დაგვაბეს, ამოიღეთ ფული რაც გაქვთო. მამაჩემი სცემეს, დედაჩემიც. სახეზე დანა დაუსვეს. მერე მე ამიყვანეს. რაც გვქონდა ოქრო და ფული მივეცით, 2 000 ლარამდე იყო თანხა. ორს იარაღი ეჭირა და სამივეს ჰქონდა დანა. მამაჩემს თავი და ორივე თვალი აქვს გასიებული, სახე აქვს გაჭრილი, დედაჩემს ცხვირი მოაჭრეს, სახე გაკერილი აქვს. გვითხრეს, ხვალ რომ გნახოთ პოლიციაში ან ტელევიზიაშიო იმ დღესვე მოგჭრით თავსო", - უთხრა რუსთავი 2-ს დაყაჩაღებული ოჯახის ერთ-ერთმა წევრმა.

საქმეზე გამოძიება სისხლის სამართლის კოდექსის 179-ე მუხლი მეორე და მესამე ნაწილებით მიმდინარეობს. ამ მუხლით ჯგუფური ყაჩაღობისთვის პირს 5-დან 12 წლამდე პატიმრობა ემუქრება.