მადრიდის რეალის პრეზიდენტმა ფლორენტინო პერესმა ტოტის გადმობირების მცდელობაზე, იუვენტუსთან მოპოვებულ გამარჯვებასა (0:3) და ფინალში ბარსელონასთან დაპირისპირების შესაძლებლობაზე ისაუბრა.

"ტოტი იმ ლეგენდარულ ფეხბურთელებს მიეკუთვნებოდა, რომლებიც ყველას სურდა. 2006 წლამდე, სანამ პრეზიდენტი გავხდებოდი, დავურეკე და გადმოსვლა ვთხოვე, მან კი მითხრა, რომ რომას მიტოვება არ შეეძლო", - განაცხადა პერესმა.

რეალის პრეზიდენტმა იუვენტუსთან მოპოვებულ გამარჯვებას (0:3) ემოციური უწოდა და ტურინელი გულშემატკივრების პატივისცემის უნარს გაუსვა ხაზი. მისივე თქმით, მას ფინალამდე რეალის შეხვედრა ბაიერნთან უფრო წარმოუდგენია, ვიდრე ბარსასთან.

"გვსურს თუ არა ფინალში ბარსელონას წინააღდეგ თამაში? ამ ეტაპზე, მთავარი ფინალში გასვლაა. თუმცა, გული მიგრძნობს, რომ ჯერ ბაიერნს შევხვდებით, რადგან მათთან თამაში ყოველთვის გვიწევს".

"თუ მათ (ბარსელონას) შევხვდებით, უნდა გვახსოვდეს, რომ ბოლო ერთ წელიწადში ისინი ორ ფინალში დავამარცხეთ".