საქართველოს პირველი პრეზიდენტის, ზვიად გამსახურდიას სიკვდილის საქმის გამოძიების მოთხოვნით თბილისში, პარლამენტის შენობასთან აქცია გაიმართა. პარლამენტის შენობასთან რამდენიმე ათეული ადამიანი შეიკრიბა.

თავისუფალი საქართველოს ლიდერი, კახა კუკავა ამბობს, რომ მთავარი მოთხოვნა ამ საქმის ბოლომდე მიყვანა.

"რასაც აკეთებდა [ედუარდ] შევარდნაძე და [მიხეილ] სააკაშვილი იმავეს აგრძელებს [ბიძინა] ივანიშვილი - საქმე დევს თაროზე. არანაირი რეალური საგამოძიებო მოქმედებები არ ტარდება და გაიცა ახლა პოლიტიკური დაკვეთა, რომ 31 დეკემბერს, როცა [საქმის] ხანდაზმულობის 25-წლიანი ვადა გავა საქმე უნდა დაიხუროს", - უთხრა იმედს კახა კუკავამ.

ზვიად გამსახურდიას შვილი, ცოტნე გამსახურდია ამბობს, რომ საგამოძიებო უწყებები მხოლოდ ინფორმაციის მიღებითაა დაკავებული და არ ცდილობს დამატებითი დეტალების გარკვევას.

"ჩანს პროკურატურის სრული უმოქმედობა, სრული უნებისყოფობა. მათ უბრალოდ არ გააჩნიათ ნება ამ საკითხზე გაირკვეს ჭეშმარიტება და დაისაჯონ დამნაშავეები", - ამბობს იმედთან საუბრისას გამსახურდია.