დმანისის გადარჩენის ფონდში გაერთიანებულმა ოპოზიციურმა პარტიებმა 300-წლიანი ხის შეძენა გადაწყვიტეს. ხე აუქციონზეა გამოტანილი, ოპოზიციური პარტიის წარმომადგენლები კი ამბობენ, რომ ხის შეძენა საქართველოს ყოფილ პრემიერსა და ქართული ოცნების დამფუძნებელს, ბიძინა ივანიშვილს სურს და ამიტომ იყიდება.

ერთიანი ნაციონალური მოძრაობის წევრის, ნიკა მელიას თქმით, ხე აჭარაში, მწვანე კონცხზეა და მისი საწყისი ღირებულება 7 ათასი ლარია.

"აქ არ არის ხეში საქმე, აქ არის უბრალოდ მიდგომაში, ყველგან, სადაც ცხვირს შეყოფს ბიძინა ივანიშვილი, ყველგან, სადაც შეყოფს ფეხს, ხელს ყველგან მოტყდება ხელიც, ფეხიც და ცხვირიც. იქ, სადაც არის სახელმწიფო საკუთრება, საზოგადოებრივი სიკეთე, ეროვნული სიმდიდრე და ამას იტაცებს და იქ წავასწრებთ, ყველაფერს გავაკეთებთ, რომ ხელში ჩავარტყამთ და ადგილზე გავაშეშოთ", - აღნიშნა ნიკა მელიამ რუსთავი 2-სთვის მიცემულ ინტერვიუში.

300-წლიან ხეზე აუქციონის გამოცხადებას ბიძინა ივანიშვილის ინტერესებს უკავშირებს რესპუბლიკური პარტიის პოლიტიკური მდივანი, თამარ კორძაიაც.

"თითოეულმა ჩვენგანმა რომ ვისურვოთ, რუსთაველის გამზირზე არსებული ზეთის ხილის ხის შეძენა თბილისის მერია ან სახელმწიფო გამოგვიცხადებს აუქციონს?!" - თქვა კორძაიამ რუსთავი 2-თან საუბრისას.

მისი თქმით, ოპოზიციური პარტიები იმიტომ ერთვებიან აუქციონში, რომ საზოგადოებას აჩვენონ - არც ქვეყანა და არც ხე ერთი ადამიანის არ არის.