გიორგი გიორგანაშვილის და ბექა წიქარიშვილის დაკავების გასაპროტესტებლად, კანცელარიასთან დაგეგმილი აქციის დრო და ადგილი შეიცვალა. აქცია თბილისში, პარლამენტის შენობასთან 6 საათზე გაიმართება. თეთრი ხმაურის მოძრაობის განმარტებით, აქციის ლოკაციის და დროის ცვლილების მიზეზი მხარდამჭერთა რაოდენობის ზრდაა.

ერთი ყველასთვის- ამ ლოზუნგით სხვადასხვა არასამთავრობო ორგანიზაციები და მხარდამჭერები მოითხოვენ დაკავებულების გათავისუფლებას, საქმეში მონაწილე პოლიციელების დასჯას და ჰუმანურ ნარკოპოლიტიკას :

"მოვითხოვთ: გიორგი გორგანაშვილი დაუყოვნებლივ გათავისუფლდეს საპატიმრო დაწესებულებიდან; გათავისუფლდეს მოძრაობის წევრი ბექა წიქარიშვილი; კანონის სრული სიმკაცრით დაისაჯონ საქმეში მონაწილე პოლიციელები; უმოკლეს ვადებში შეიცვალოს რეპრესიული , ფაშისტური ნარკოპოლიტიკა. მოვუწოდებთ საქართველოს პრეზიდენტს, გამოიჩინოს კეთილი ნება, გამოიყენოს საკუთარი უფლებამოსილება და დაგვიბრუნოს გიორგი გიორგანაშვილი. სწორედ ამ მოთხოვნებს ეფუძნება აქცია ლოზუნგით - ყველა ერთისთვის! "

თანასწორობის მოძრაობის ინიციატივით, 4 საათზე აქცია გაიმართება თელავშიც, თეატრის შენობასთან.

ბახალას გათავისუფლების მოთხოვნით მანიფესტიც შეიქმნა. მანიფესტში აღნიშნულია, რომ გიორგი გიორგანაშვილი უსამართლო სისტემის მორიგი მსხვერპლია და სამართალდამცავებმა დაკავებისას ნარკოტიკი ჩაუდეს.

თბილისის საქალაქო სასამართლომ გიორგი გიორგანაშვილს, იგივე ბახალას 0,3726 გრამი სუბოტექსის ფლობისთვის 8-წლიანი პატიმრობა მიუსაჯა.

პროცესის შემდეგ, სასამართლოსთან ხმაურის მოძრაობის აქტივისტი ბექა წიქარიშვილი და მსახიობი თორნიკე ბზიავა დააკავეს. თორნიკე ბზიავა უკვე გაათავისუფლეს. წიქარიშვილის საქმეზე კი გამოძიება ადმინისტრაციულ სამართალდარღვევათა კოდექსის 173-ე და 166-ე მუხლებით მიმდინარეობს, რაც სამართალდამცავის მოთხოვნისადმი დაუმორჩილებლობას და წვრილმან ხულიგნობას გულისხმობს. როგორც შინაგან საქმეთა სამინისტროში აცხადებენ, საქმე აღძრულია სისხლის სამართლის კოდექსითაც, კერძოდ, სასამართლოს შენობაში მინის გატეხვის ფაქტზე. გამოძიება 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.