რუსული სამთავრობო საინფორმაციო სააგენტო Ria Novosti-ს ინფორმაციით, რუსეთის პრეზიდენტმა, ვლადიმერ პუტინმა თურქეთისთვის დაწესებული სანქციების გაუქმებას ხელი მოაწერა. კერძოდ, შეზღუდვების მოხსნა ტურისტული მარშრუტების თურქეთის მიმართულებით განხორციელებას შეეხება.

კრემლის განმარტებით, პუტინმა ხელისუფლებას ორ მხარეს შორის ჩარტერული გადაზიდვების აკრძალვის შესახებ დაწესებული შეზღუდვების მოხსნა და ანკარასთან მიმართებით ეკონომიკური სანქციების მოხსნის მექანიზმის განხილვაც დაავალა.

აღსანიშნავია, რომ ბრძანება ძალაში მისი გამოქვეყნებისთანავე შევა.

გუშინ, 29 ივნისს, რუსეთის პრეზიდენტმა განაცხადა, რომ დაავალებს მთავრობას აღადგინოს ორმხრივი თანამშრომლობა თურქეთის შესაბამის ორგანოებთან სავაჭრო-ეკონომიკურ და სხვა სფეროებში.

რუსეთსა და თურქეთს შორის ურთიერთობა 2015 წლის ნოემბერში მას შემდეგ დაიძაბა, როდესაც თურქულმა თვითმფრინავმა რუსული ბომბდამშენი სირიაში ჩამოაგდო. სწორედ აღნიშნულის შემდეგ შემოიღო რუსეთმა თურქეთთან ურთიერთობაში ეკონომიკური შეზღუდვები. კერძოდ, აკრძალვის ქვეშ მოექცა ჩარტერული თვითმფრინავები, რუსულ ტუროპერატორებს კი განუცხადეს, რომ თურქეთის მიმართულებით აღარ ემუშავათ.

შედეგად, თურქეთის ეკონომიკამ მილიარდობით დოლარი დაკარგა, რადგან რუსი ტურისტების რაოდენობა 79%-ით შემცირდა.

პირდაპირი მოლაპარაკებები ორი ქვეყნის ლიდერს შორის მას შემდეგ გახდა შესაძლებელი, რაც თურქეთის პრეზიდენტმა პუტინს წერილი მისწერა, რომელშიც ბომბდამშენის ჩამოგდების გამო მოუბოდიშა და გარდაცვლილი პილოტის გარდაცვალების გამო მწუხარება გამოხატა.