შავი ზღვის ეკონომიკური ფორუმის მინისტერიალზე დასასწრებად, რომელიც სოჭში 1-ელ ივლისს გაიმართება, საქართველოს საგარეო საქმეთა სამინისტროს ერთ-ერთი დეპარტამენტის წარმომადგენელი გაემგზავრება.

გრიგორი კარასინი საგარეო საქმეთა მინისტრ მიხეილ ჯანელიძეს აკრიტიკებს და აღნიშნავს, რომ ქვეყნის საგარეო საქმეთა მინისტრი მნიშვნელოვან რეგიონულ ღონისძიებებში მონაწილეობას უნდა იღებდეს და მიუხედავად მჭიდრო გრაფიკისა სერგეი ლავროვი იქ იქნება.

„მინისტრმა როგორც ჩანს გადაწყვიტა რომ სოჭში ამ ღონისძიებაზე გამოჩენა პოლიტიკურად საშიშია მოახლოებული 8 ოქტომბრის არჩევნების ფონზე, თუმცა ვფიქრობ რომ ეს საკითხზე ძალიან ვიწრო შეხედულებაა“.

დიპლომატი ზურაბ აბაშიძე კი აცხადებს, რომ რუსეთ-საქართველოს შორის ურთიერთობები არ იძლევა იმის საშუალებას, რომ პოლიტიკურმა ფიგურებმა ვიზიტები განახორციელონ.

საგარეო საქმეთა სამინისტროს პრეს-ცენტრი აცხადებს, რომ ჯანელიძე-ლავროვს შორის სოჭში პირისპირ დიალოგის თემა არ განხილულა.

მინისტერიალი 1992 წლიდან მოქმედებს და მასში საქართველოს გარდა აზერბაიჯანი, თურქეთი, სომხეთი, უკრაინა, ალბანეთი, ბულგარეთი, საბერძნეთი, მოლდოვა, რუმინეთი, სერბეთი და რუსეთი იღებს მონაწილეობას.