შინაგან საქმეთა სამინისტროს განვხადებით, თბილისში ჩატარებული ე.წ. პირბადეების აქცია არ შეიცავს დანაშაულის ნიშნებს. უწყების ცნობით, სამინისტროში შევიდა სამი მოქალაქის წერილი, რომ დედაქალაქის სხვადასხვა უბანში საზოგადო მოღვაწეთა და კულტურულ ძეგლებს დაუდგენელმა პირებმა პირბადეები გაუკეთეს:

"მიმდინარე წლის 29 ნოემბერს, თბილისში განხორციელებულ ე.წ. პირბადეების აქციასთან დაკავშირებით, შსს-ს გამოძიება არ დაუწყია. წერილების საფუძველზე, ფაქტი ქალაქ თბილისის პოლიციის დეპარტამენტმა შეისწავლა".

"სოციალურ აქტს თავის თავზე იღებენ ჟანგბადის ნინძები", - ამ სახის ანონიმური წერილი მიიღო On.ge-მ დღეს, 29 ნოემბერს. სოციალური კამპანიის ავტორები ქალაქში სუფთა ჰაერს მოითხოვენ და აცხადებენ, რომ მათი ამგვარი აქტივობა მხოლოდ დასაწყისია.

29 ნოემბერის დილით თბილისში ძეგლების ნაწილი მოქალაქეებს პირბადით დახვდათ. თბილისის ვიცე-მერმა ირაკლი ხმალაძემ განაცხადა, რომ მერია ამას არ მიესალმება და აღნიშნულ ფაქტს ძეგლების შეურაცხყოფა უწოდა.