ადამიანის უფლებათა ცენტრის (HRC) განცხადებით, დეკანოზ გიორგი მამალაძეს პენიტენციური დაწესებულებიდან ომბუდსმენის ცხელ ხაზზე დარეკვის უფლება არაკანონიერად ეზღუდება

ცენტრის იურისტთან შეხვედრისას გიორგი მამალაძემ განაცხადა, რომ 13 ნოემბერს მან სახალხო დამცველის აპარატის ცხელ ხაზზე (1481) დარეკვა მოითხოვა, რაზეც მეცხრე პენიტენციური დაწესებულების დირექტორის მოადგილემ და თანამშრომელმა უარი უთხრეს იმ მოტივით, რომ მას ამოწურული ჰქონდა სამი ზარის განხორციელების ლიმიტი. იმავე დღეს მსჯავრდებულმა წერილობით მიმართა დაწესებულების დირექტორს და მოითხოვა წერილობითი განმარტება.

ცენტრის თქმით, დაწესებულების დირექტორმა, ზაზა ჯამატაშვილმა მსჯავრდებულს სატელეფონო ზარის განხორციელებაზე უარის საფუძვლად მიუთითა, რომ მას ამოწურული ჰქონდა საკუთარი ხარჯით ტელეფონით სარგებლობის თვიური ლიმიტი.

ადამიანის უფლებათა ცენტრი დაუშვებლად მიიჩნევს პენიტენციური დაწესებულების მხრიდან მსჯავრდებულისთვის სახალხო დამცველის ცხელი ხაზის ნომერზე დარეკვის შეზღუდვას ლიმიტის ამოწურვის მიზეზით.

"ზოგიერთ პენიტენციურ დაწესებულებაში გამოკრულია კიდეც ინფორმაცია, რომ თვეში სამი ზარის ლიმიტი არ ეხება სახალხო დამცველის ოფისის ტელეფონის ნომრებზე, მათ შორის - ცხელ ხაზზე დაკავშირებას", - ნათქვამია განცხადებაში.

ადამიანის უფლებათა ცენტრს მიაჩნია, რომ თვეში სამი ზარის ლიმიტში არ შეიძლება შედიოდეს სახალხო დამცველის ცხელი ხაზის ნომერი, რომელზე დარეკვაც პატიმრისთვის, შესაძლოა, საჭირო გახდეს გადაუდებელი აუცილებლობისას:

"მაგალითად - თუკი მსჯავრდებული ჩივის პენიტენციურ დაწესებულებაში არასათანადო მოპყრობის შესახებ ან სხვა კანონიერი საჭიროებიდან გამომდინარე და სურს სახალხო დამცველის ცხელ ხაზზე დაკავშირება. ასეთ შემთხვევაში, გამოდის, რომ თუკი თვეში სამი სატელეფონო ზარი განხორციელებული აქვს, მსჯავრდებულს ერთმევა შესაძლებლობა, დაუკავშირდეს სახალხო დამცველს გადაუდებელი წესით".

ადამიანის უფლებათა ცენტრის განმარტებით, დაწესებულების დირექცია არასწორად განმარტავს რეგულაციას.