ევროპული საქართველო საკონსტიტუციო კომისიაში მონაწილეობას არ მიიღებს. პარტიის გადაწყვეტილება დავით ბაქრაძემ ბრიფინგზე თქვა.

ბაქრაძის თქმით, უმრავლესობა არ გეგმავს შინაარსობრივი საკითხების ცვლილებას და მხოლოდ წინასწარ დაანონსებული საკითხების შეცვლა აქვს განზრახული.

"საპარლამენტო უმრავლესობამ ოპოზიციას დიალოგის კარი დაუხურა მანამ, სანამ დიალოგი დაიწყებოდა. ასეთ პირობებში, როდესაც წინასწარ არის გაცხადებული, არანაირ შინაარსობრივ ცვლილებაზე ეს კომისია და უმრავლესობა არ დათანხმდება, რა თქმა უნდა, ჩვენ მუშაობის არსს კომისიაში ვერ ვხედავთ", - აღნიშნა ბაქრაძემ.

მას მიაჩნია, რომ ცვლილებები, რომლის შეტანაც უმრავლესობას სურს მათ მიერვე "გაფუჭებულის" გამოსწორებაა.

"საქართველომ მიიღო ერთპარტიული კონსტიტუცია და ეს სამწუხაროა. მან ვერ გაუძლო დროის გამოცდას თუ უმრავლესობისგან და ქართული ოცნებისგან იქნება იმის სიგნალი, რომ ისინი მზად არიან კონსტიტუციის შინაარსობრივი განხილვისთვის, ვადასტურებ, რომ ჩვენ მზად ვართ მონაწილეობა მივიღოთ შინაარსობრივ განხილვაში და მზად ვართ ყველაფერი გავაკეთოთ კონსენსუსისთვის", - აღნიშნა ბაქრაძემ.

13 ოქტომბერს, ქართულმა ოცნებამ საქართველოს პრეზიდენტის მოტივირებული შენიშვნები არ გაითვალისწინა და კონსტიტუციის პროექტზე დადებული ვეტო დაძლია. კენჭისყრაში მონაწილეობა არ მიუღიათ ნაციონალურ მოძრაობასა და ევროპულ საქართველოს. კანონპროექტის დამტკიცების შემდეგ, რამდენიმე დღეში, გიორგი მარგველაშვილმა, კონსტიტუციის ახალ პროექტს ხელი მოაწერა.