Tesla კალიფორნიაში, ფრიმონტში Optimus-ის სპეციალურ საწარმოო ხაზს აშენებს და პირველ პროდუქციას მიმდინარე წლის ბოლოსკენ ელოდება. კომპანიის აღმასრულებელმა დირექტორმა, ილონ მასკმა განაცხადა, რომ ჰუმანოიდი რობოტის მასშტაბირება უფრო რთული იქნება, ვიდრე ნებისმიერი სხვა საწარმოო პროგრამა, რომელიც კომპანიას აქამდე განუხორციელებია. Optimus-ის გასაწვრთნელად Tesla ხელოვნური ინტელექტის იმავე end-to-end მიდგომას იყენებს, რასაც სრულად ავტონომიური მართვის სისტემაში, ხოლო წარმოებაში Samsung-ს, TSMC-ს, Panasonic-სა და Micron-ს ეყრდნობა.

ოთხშაბათს, Tesla-ს ფინანსური ანგარიშგების ზარისას, მასკმა ინვესტორებს განუცხადა, რომ Optimus კომპანიის ყველაზე ამბიციური პროექტია და, შესაძლოა, საბოლოოდ Tesla-ს უდიდეს პროდუქტად იქცეს. თუმცა, მან წარმოების ტემპთან დაკავშირებული მოლოდინების შერბილებაც სცადა: ფართომასშტაბიან წარმოებაზე გადასვლამდე კომპანიას ერთდროულად რობოტის ინტელექტზე, მექანიკურ დიზაინსა და მიწოდების ჯაჭვზე უწევს მუშაობა.

მასკის თქმით, წარმოების კუთხით Optimus ტიპურ S-მრუდს მიჰყვება, თუმცა "S-მრუდის საწყისი ნაწილი საკმაოდ სტატიკური და ხანგრძლივი იქნება", რადგან Tesla-ს ავტომობილებისგან განსხვავებით, ძირითადი კომპონენტების უმეტესობისთვის Optimus უკვე არსებულ მიწოდების ჯაჭვს ვერ დაეყრდნობა.

"წარმოების მასშტაბირების კუთხით, ეს ყველაზე რთული იქნება იმ ყველაფერს შორის, რაც კი აქამდე Tesla-ში შეგვიქმნია, რადგან რობოტში ყველაფერი ახალია და წარმოების ტემპის გაზრდის სირთულე რობოტის ნაწილების სიახლის პროპორციულია", — თქვა მასკმა.

Tesla-ს სურს, რომ სპეციფიკური დაპროგრამების გარეშე, Optimus-მა სამუშაო ხმოვანი ინსტრუქციის მიღების ან დემონსტრაციის ნახვის შემდეგ შეასრულოს. მასკის თქმით, კომპანიის მიზანია, გასცდეს კონტროლირებად დემონსტრაციებს და შექმნას რობოტი, რომელიც ქარხნებსა და სახლებში სასარგებლო, ზოგადი ამოცანების შესრულებას შეძლებს.

"ალბათ, ინტერნეტში რობოტების არაერთი შთამბეჭდავი დემონსტრაცია გინახავთ, მაგრამ რასაც ხედავთ, წინასწარ დაპროგრამებული ან დისტანციურად მართულია, ამიტომ არ არსებობს ჰუმანოიდი რობოტი, რომელსაც რეალურად შეუძლია ზოგადი ამოცანების შესრულება", — აღნიშნა მასკმა — "Optimus იქნება პირველი, ვინც ამას შეძლებს. ეს არ იქნება უბრალოდ დემო, არამედ იგი ყოველდღიურ ცხოვრებაში ნამდვილად სასარგებლო იქნება."

• ისტორიაში პირველად, ჰუმანოიდმა რობოტმა ქირურგიული ოპერაცია ჩაატარა

Optimus-ის მიწოდების ჯაჭვი

Tesla-ს ვიცე-პრეზიდენტმა მიწოდების ჯაჭვის საკითხებში, კარნ ბუდირაჯმა, აღნიშნა, რომ კომპანიამ წარმოების მნიშვნელოვანი ნაწილი შიდა რესურსებით უზრუნველყო, მაშინ როცა მომწოდებლებთან ისეთ სპეციალიზებულ კომპონენტებზე მუშაობდა, როგორებიცაა ლითონის ინიექციური ჩამოსხმის ნაწილები და მოქნილი ბეჭდური დაფები, რომლებიც ტრადიციული საავტომობილო მიწოდების ჯაჭვის მიღმა რჩება.

მასკმა აღნიშნა, რომ Samsung და TSMC ნახევარგამტარების საწარმოო შესაძლებლობებს შესაბამისად ტეხასსა და არიზონაში აფართოებს, Panasonic-მა ელემენტების წარმოების გაზრდაში "მრავალი მილიარდი" დააბანდა, ხოლო Micron-მა მეხსიერების ამჟამინდელი მაღალი ფასების ფონზე Tesla-სთვის მომავალი წლების მიწოდება უზრუნველყო.

ფრიმონტში Optimus-ის ხაზი იმ სივრცეში მონტაჟდება, სადაც ადრე Model S და Model X იწარმოებოდა. მასკმა ისაუბრა Optimus 3-ის წლიური წარმოების 1 მილიონ ერთეულამდე გაზრდაზე, მაშინ როცა ტეხასში, ოსტინში დაგეგმილმა უფრო ვერტიკალურად ინტეგრირებულმა Optimus 4 პროგრამამ, შესაძლოა, წელიწადში 10 მილიონ ერთეულს მიაღწიოს.

Optimus-ის გაწვრთნა

Tesla-ს ვიცე-პრეზიდენტმა AI-ის მიმართულებით, აშოკ ელუსვამიმ, თქვა, რომ რობოტი იმავე end-to-end სტრატეგიას გამოიყენებს, რასაც კომპანიის მართვის პროგრამული უზრუნველყოფა, რომელიც კამერიდან მიღებულ მონაცემებს პირდაპირ ფიზიკურ ქმედებებად გარდაქმნის. Optimus ინტერნეტვიდეოებიდან, Tesla-ს ქარხნის მუშების დემონსტრაციებიდან და მონაცემთა სპეციალური გუნდის მიერ შეგროვებული მაგალითებიდან ისწავლის. კომპანია დიდი რაოდენობით რობოტების პრაქტიკულ მუშაობას ასევე Optimus Academy-ში გეგმავს.

"განმტკიცებითი სწავლების ციკლი სწორედ ამ დროს იწყება. რობოტი თავდაპირველად რაიმე დავალების შესრულებას ცდილობს და ზოგჯერ მარცხდება. შემდეგ ის ამ ამოცანების წარმატებებიდან და წარუმატებლობიდან სწავლობს და საბოლოოდ დავალებებს, შესაძლოა, ზეადამიანურ დონეზეც კი ეუფლება", — განაცხადა ელუსვამიმ.

ფინანსური ფონი

Tesla-ს აქციები ფინანსური შედეგების გამოქვეყნების შემდეგ კვირის განმავლობაში 18%-ით დაეცა და პარასკევს ვაჭრობა 313,03 დოლარზე დაიხურა, რაც 2022 წლის შემდეგ ყველაზე ცუდი ყოველკვირეული ვარდნაა. მეორე კვარტლის კორექტირებულმა მოგებამ ერთ აქციაზე 33 ცენტი შეადგინა და LSEG-ის 51-ცენტიან პროგნოზს ჩამორჩა, თუმცა 28,24 მილიარდი დოლარის შემოსავალმა მოლოდინს გადააჭარბა. საოპერაციო მარჟა 1,4%-მდე დაეცა, ხოლო კაპიტალური დანახარჯები 142%-ით გაიზარდა და 5,79 მილიარდ დოლარს მიაღწია.

• ჰუმანოიდი რობოტები ბრძოლის ველზე — რეალობა თუ ფანტასტიკა?