წელიწადის ყველაზე ცხელი პერიოდი, ზაფხულის სიცხე თავისდაუნებურად მოითხოვს ნაკლებ მუშაობას, განტვირთვასა და დასვენებას. ეს სტატია მათთვისაა, ვისაც ზაფხულის არდადეგებსა თუ შვებულებაში საინტერესო, მარტივად წასაკითხი, მაგრამ დასამახსოვრებელი, ამაღელვებელი ისტორიების კითხვა უყვარს. ხშირად, როდესაც წიგნს გვირჩევენ, გვაინტერესებს რაზეა. ამ ყველაზე ხშირად დასმულ კითხვაზე პასუხსაც აქვე წაიკითხავთ.

იქ, სადაც კიბორჩხალები მღერიან

წიგნი, რომელიც უკვე წლებია ქართველი მკითხველის ერთ-ერთი უცვლელი რჩეულია. მის მიხედვითვეა გადაღებული ფილმი, რომელიც ასევე დიდი პოპულარობით სარგებლობს.

რაზეა? გამოძიება და მკვლელობა, უცნაური, საზოგადოებისგან გარიყული გოგონა და მისი ისტორია, სიყვარული და მარტოობის განცდა, ადამიანისა და ბუნების ურთიერთობის საოცარი აღწერა. წიგნი ყველაფერს მოიცავს და თითქმის ყველა ასაკის მკითხველს ერთიანად ნუსხავს. მოკალათდით ტბის პირას, იქ, სადაც კიბორჩხალები მღერიან და შეაბიჯეთ კაია კლარკის სამყაროში.

ჰამნეტი

ქარჩხაძის გამომცემლობამ მკითხველის დიდი თხოვნით განაახლა ჰამნეტის ტირაჟი. წიგნს განსაკუთრებული პოპულარობა მოუტანა ამავე სახელწოდების ფილმმა, რომელიც წელს ოსკარების დაჯილდოების ერთ-ერთი რჩეული იყო.

რაზეა? ჰამნეტი შექსპირის ჰამლეტის შექმნის ისტორიაა, მაგრამ სულ სხვანაირი მხრიდან ნაჩვენები და აღწერილი. ეს არაა მორიგი წიგნი უილიამ შექსპირის ცხოვრებისა და შემოქმედების შესახებ. ესაა რომანი ოჯახზე, დიდ სიყვარულსა და უზარმაზარ ტრაგედიაზე. ესაა წიგნი ცხოვრებასა და მის მოულოდნელობებზე, გლოვასა და ამ გლოვაში ერთმანეთის არ დავიწყებაზე, ზრუნვასა და მუდმივ, უკვდავ სიყვარულზე.

კენკრის მკრეფავები

წიგნი, რომელმაც გამოცემისთანავე მოიპოვა პოპულარობა და ქართველ მკითხველს უკვე შეაყვარა თავი.

რაზეა? დედაშვილობა და და-ძმობა, ტრაგედია, რომელიც ოჯახს ანაწევრებს, ოჯახის წევრების ბედს კი სრულიად ცვლის. რა ხდება მაშინ, როდესაც სიმართლეს გიმალავენ, გული კი რაღაცას მაინც გიგრძნობს. როგორია, ცხოვრობდე სხვისი ცხოვრებით. როგორია, თავს მუდამ იდანაშაულებდე იმაში, რაც შენი ბრალი არ ყოფილა და ვერც ვერაფერს შეცვლიდი. წიგნი, რომელიც მკითხველს განსაკუთრებით ნუსხავს თხრობის სტილითა და პერსონაჟების მრავალფეროვნებით.

გახლეჩილი მიწა

ერთი ამოსუნთქვით საკითხავმა ამ რომანმა დიდი მოწონება დაიმსახურა. ინტერნეტში არსებული უცხოური და ახლა უკვე ქართული განხილვები ერთხმად მოწმობს, რომ წიგნი მარტივად იკითხება და საინტერესო სიუჟეტი აქვს.

რაზეა? პატარა სოფელი და ერთმანეთთან უხილავი ძაფით დაკავშირებული ადამიანები. ბედისწერის უკუღმართობა და ჩახლართული, არეული ცხოვრების გამოსწორების მუდმივი მცდელობა. სიყვარული, რომელიც მრავალმხრივი, მრავალსახა, ამოუხსნელი და სულ სხვადასხვაგვარი შეიძლება იყოს. რა ხდება მაშინ, როდესაც გრძნობები იმარჯვებს, გულის კარნახს აჰყვები, გონების ხმას კი ცოტა ხნით ყურს არ უგდებ.

ოთხი ქარი

არსებობენ თანამედროვე ავტორები, რომელთა წერის სტილი, თემები და საინტერესოდ აგებული სიუჟეტი თუ პერსონაჟების ხასიათები მკითხველს განსაკუთრებით უყვარდება. ასეთია კრისტინ ჰანა და მისი საოცარი წიგნები.

რაზეა? წიგნი იმდენად მრავალფეროვანია, რომ სულ სხვადასხვა გემოვნების მკითხველის მოთხოვნებს მარტივად აკმაყოფილებს. აქაა სიყვარული და თავდადება, ბრძოლა გადარჩენისთვის და საოცრად საინტერესოდ აღწერილი ისტორიული კონტექსტი. ე.წ ცნობილი ამერიკული ოცნების რეალობა, მწარე სიმართლე და ბევრი მიჩქმალული ამბავი. მკითხველი პირველივე ფურცლიდან მონუსხულია და ბოლომდე გულშემატკივრობს ქალს, რომელსაც მხოლოდ ის უნდოდა, საკუთარი თავი ეპოვა, ეცხოვრა ლაღი, უდარდელი ცხოვრებით და ყოფილიყო იმდენად ძლიერი, რამდენადაც ამას შეძლებდა.

საკანცელარიო მაღაზია თეირანში

არსებობს წიგნები, რომლებიც უცხო ქვეყნის ისტორიას, კულტურას, ცხოვრების წესსა და იქ მცხოვრებ ადამიანებს ახლოდან გაცნობს, თითქოს მათთან გაახლოებს. სწორედ ასეთია მარჯან ქამალის ეს საოცარი რომანი.

რაზეა? ირანის სახელმწიფო გადატრიალების ფონზე მიმდინარე სიყვარულის ისტორია, დაძაბული ვითარება და ადამიანების მცდელობა, ჩაებღაუჭონ იმ ცხოვრებას, რომელიც მათთვის ასე ძვირფასია. ბევრი ტრაგედია და დანაკარგი, თავისუფლებისთვის ბრძოლა და ემიგრაცია, შიში, დანებების სურვილი და მაინც იმედი მომავლის, იმედი ბედნიერებისა და იმედი სიყვარულის უკვდავებისა.

სტატიის ავტორი: ნინაკო ღლონტი