მსოფლიო ჩემპიონატი ბრაზილიის ნაკრებს ყველაზე მეტჯერ, 5-ჯერ აქვს მოგებული. თუმცა, ბრაზილიელები წლევანდელ მუნდიალს 24-წლიანი პაუზით ხვდებიან. ბრაზილიის ნაკრები წელს ფავორიტადაც კი არ ითვლება. წარმატებისთვის ფეხბურთელებს იღბალიც სჭირდებათ, ამიტომ ორშაბათს, რიო-დე-ჟანეიროს აეროპორტში, ნიუ-ჯერსიში გამგზავრებამდე სპეციალური რიტუალი შეასრულეს. გაფრენამდე, გუნდის თვითმფრინავს გზა დაულოცეს და სიმბოლურად "წყლის თაღით" გააცილეს.

"ასაფრენ ბილიკზე ორმა სახანძრო მანქანამ წყლის თაღი შექმნა, რომელშიც თვითმფრინავმა გაიარა. ეს ავიაციაში მიღებული ტრადიციაა და მას ხშირად მნიშვნელოვანი ფრენების წინ მიმართავენ — მაგალითად, როცა თვითმფრინავი ჰაერში პირველად იჭრება. ეს "მონათვლა" აეროპორტის თანამშრომლებმა მოაწყვეს, რომლებმაც ამჯერად ბრაზილიის ფეხბურთის კონფედერაციასთან შეათანხმეს ნებართვა", — წერია გამოცემა U.S. Sun-ში.

ბრაზილიამ ბოლო მოსამზადებელი ამხანაგური მატჩი 6 ივნისს, ოჰაიოში, ეგვიპტის წინააღმდეგ გამართა. C ჯგუფში მოასპარეზე გუნდი მსოფლიო ჩემპიონატს 13 ივნისს, ნიუ-ჯერსიში, მაროკოსთან შეხვედრით გახსნის.

სავარაუდოდ, ბრაზილიელებს ორივე თამაშში ნაკრების ყველა დროის საუკეთესო ბომბარდირი, ნეიმარი დააკლდებათ. გუნდის ექიმმა, როდრიგო ლასმარმა გასულ კვირას დაადასტურა, რომ ნეიმარს წვივის კუნთის მეორე ხარისხის დაჭიმულობა აქვს და გამოსაჯანმრთელებლად "ორიდან სამ კვირამდე" დასჭირდება.