საქართველოს პარლამენტის თავმჯდომარემ, შალვა პაპუაშვილმა პრემიერმინისტრ ნიკოლ ფაშინიანს სომხეთის საპარლამენტო არჩევნებში გამარჯვება მიულოცა. ამის შესახებ მან ბრიფინგზე ჟურნალისტებთან საუბრისას განაცხადა.

პაპუაშვილმა ხაზი გაუსვა იმას, რომ მნიშვნელოვანია რეგიონში მშვიდობა, სტაბილურობა, რომელსაც მარტო საქართველო ვერ უზრუნველყოფს და მნიშვნელოვანია მთლიანად რეგიონში ყველა იყოს ამისთვის მოწადინებული. მისივე განმარტებით, ნიკოლ ფაშინიანის დაპირება სწორედ მშვიდობის და სტაბილურობის უზრუნველყოფა იყო სომხეთისთვის, რაც საბოლოო ჯამში ნიშნავს მშვიდობას, სტაბილურობას მთლიანად რეგიონისთვის.

"ჩვენ წარმატებას ვუსურვებთ ნიკოლ ფაშინიანს და მის პარტიას. პრემიერმინისტრმა ჯერ კიდევ გუშინ მიულოცა მას წარმატებული არჩევნები. ჩვენთვის მნიშვნელოვანი არის ის ახალი დინამიკა, რომელიც არსებობს რეგიონში — აზერბაიჯანსა და სომხეთს შორის სამშვიდობო შეთანხმებისკენ მიმავალი გზა, გახსნილი საზღვრები, სომხეთსა და აზერბაიჯანს შორის მიმდინარე დიალოგი. ჩვენთვის მნიშვნელოვანია რეგიონში მშვიდობა, სტაბილურობა, რომელსაც მარტო საქართველო ვერ უზრუნველყოფს. მნიშვნელოვანი არის, რომ მთლიანად რეგიონში ყველა იყოს მოწადინებული და ნიკოლ ფაშინიანის დაპირება სწორედ ეს იყო — მშვიდობის და სტაბილურობის უზრუნველყოფა სომხეთისთვის, რაც საბოლოო ჯამში ნიშნავს მშვიდობას, სტაბილურობას მთლიანად რეგიონისთვის. ეს თავის მხრივ წაადგება რეგიონის თითოეული ქვეყნის, სახელმწიფოს და ერის კეთილდღეობას", — განაცხადა შალვა პაპუაშვილმა.

შეგახსენებთ, სომხეთის ცენტრალურმა საარჩევნო კომისიამ საპარლამენტო არჩევნებზე ყველა — 2005-ივე საარჩევნო უბნის ხმების დათვლის წინასწარი შედეგები გამოაქვეყნა.

პრემიერმინისტრ ნიკოლ ფაშინიანის პარტია სამოქალაქო შეთანხმებამ ყველაზე მეტი — 727,160 ხმა (49.81%) მოიპოვა. სემველ კარაპეტიანის ძლიერი სომხეთი მეორე ადგილზეა 340,062 ხმით (23.29%), მას მოსდევს ყოფილი პრეზიდენტის, რობერტ ქოჩარიანის ალიანსი სომხეთი, რომელმაც 145,097 ხმა (9.94%) მიიღო. გაგიკ წარუკიანის პარტიამ აყვავებული სომხეთი 58,368 ხმით მოაგროვა ბარიერის გადასალახად საჭირო 4%.