აშშ-ის თავდაცვის ავტორიზაციის აქტის (NDAA) პროექტში ორი შესწორება შედის — მათი თანაავტორი რესპუბლიკელი კონგრესმენი ჯო უილსონია. ორივე შესწორება წარმომადგენელთა პალატის შეიარაღებული ძალების კომიტეტმა 4 ივნისს დაამტკიცა.

შესწორებაში ვკითხულობთ, რომ "კომიტეტი შეშფოთებულია საქართველოში ოპოზიციონერი ლიდერების, აქტივისტებისა და სხვა პირების მიმართ მიმდინარე დაკავებებისა და პატიმრობის პრაქტიკით, რომელთაც პოლიტპატიმრებად მიიჩნევენ".

NDAA-ს პროექტის თანახმად, კომიტეტი თავდაცვის მდივანს ავალებს წარმომადგენელთა პალატის შეიარაღებული ძალების კომიტეტს წარუდგინოს სტრატეგია "თუ როგორ აპირებს იგი პოლიტპატიმრების საკითხის ინტეგრირებას საქართველოსთან სამხედრო თანამშრომლობისა და კომუნიკაციის ფარგლებში".

"კომიტეტი შეშფოთებულია საქართველოში ოპოზიციონერი ლიდერების, აქტივისტებისა და სხვა პირების მიმართ მიმდინარე დაკავებებისა და პატიმრობის პრაქტიკით, რომელთაც ფართოდ მიიჩნევენ პოლიტპატიმრებად. კომიტეტი მიიჩნევს, რომ ეს საკითხი საქართველოს მთავრობასთან და საქართველოს შეიარაღებულ ძალებთან ორმხრივი ურთიერთობების ფარგლებში რეგულარულად და შესაბამის მაღალ დონეზე უნდა განიხილებოდეს.

ამიტომ, კომიტეტი ავალებს თავდაცვის მდივანს, რომ არაუგვიანეს 2026 წლის 1 ოქტომბრისა, წარმომადგენელთა პალატის შეიარაღებული ძალების კომიტეტს წარუდგინოს არასაიდუმლო ანგარიში, რომელშიც დეტალურად იქნება აღწერილი თავდაცვის დეპარტამენტის სტრატეგია იმის შესახებ, თუ როგორ აპირებს იგი პოლიტპატიმრების საკითხის ინტეგრირებას საქართველოსთან სამხედრო-სამხედრო თანამშრომლობისა და კომუნიკაციის ფარგლებში," — ვკითხულობთ დოკუმენტში.

თავდაცვის პროექტში შეტანილი მეორე შესწორება თავდაცვის მინისტრს ასევე ავალებს, აქტის მიღებიდან 180 დღის ვადაში, კომიტეტს საქართველოში რუსეთისა და ჩინეთის სადაზვერვო უჯრედების შესახებ გასაიდუმლოებული ანგარიში წარუდგინოს.

წარმომადგენელთა პალატის შეიარაღებული ძალების კომიტეტის შემდეგ, აშშ-ის თავდაცვის ავტორიზაციის აქტი სენატის შეიარაღებული ძალების კომიტეტმა უნდა მიიღოს. შემდეგ კომპრომისული ტექსტი შემუშავდება და მას კენჭს უყრიან როგორც წარმომადგენელთა პალატაში, ისე სენატში, რის შემდეგაც ის ხელმოსაწერად დონალდ ტრამპს გადაეგზავნება.

შეგახსენებთ, 21 აპრილს კონგრესმენმა ჯო უილსონმა და დემოკრატმა კონგრესმენმა სტივ კოენმა წარადგინეს ორპარტიული კანონპროექტი სახელწოდებით "ჩინეთის კავკასიაზე კონტროლის საწინააღმდეგო აქტი", რომელიც მიზნად ისახავს კრემლისა და პეკინის გავლენის მასშტაბის დოკუმენტირებას საქართველოში.