ბოლო 25 წლის განმავლობაში, Google-ის ცნობილი საძიებო ველი გრძელი, ვიწრო ზოლი იყო, სადაც ადამიანები საკვანძო სიტყვებს წერდნენ — მაგალითად, "მსოფლიო ჩემპიონატი".

ბოლო სამი წლის განმავლობაში, ხელოვნურმა ინტელექტმა ადამიანებს საშუალება მისცა ძებნაში ჩაწერონ უფრო გრძელი, რთული კითხვები, როგორიცაა: "ვინ არის მსოფლიო ჩემპიონატის საუკეთესო 24 გუნდი და წინსვლის რა შანსები აქვს ინგლისის ნაკრებს?"

სწორედ ამ გარდაქმნამ უბიძგა Google-ს, რომ გასულ კვირას საძიებო ველის ზომის გადახედვა გამოეცხადებინა, ეს 2001 წლის შემდეგ პირველი ასეთი ცვლილებაა. საძიებო ველი გახდება უფრო დიდი და ინტერაქტიული, რათა მოთხოვნებში ადამიანებმა ფოტოებისა და ვიდეოების დამატებაც შეძლონ.

გარდა ამისა, Google-ის მთავარ საძიებო გვერდზე ადამიანებს შეუძლიათ დამატებითი კითხვები დაუსვან ჩატბოტს. კომპანია ასევე შემოგვთავაზებს ციფრულ ასისტენტებს, რომლებიც ძიებას ავტომატურად შეასრულებენ; (მაგალითად, ბინის მაძიებელი ადამიანი შეძლებს, ყიდვა-გაყიდვის ვებგვერდის გახსნის გარეშე მიიღოს შეტყობინება ახალ განცხადებაზე).

საძიებო ფუნქციები დამუშავდება ხელოვნური ინტელექტის ახალი მოდელით — Gemini 3.5 Flash. Google-ის თქმით, მოდელმა გააუმჯობესა პროგრამული კოდის შექმნა და ავტონომიური დავალებების შესრულება, ამავდროულად ის სხვა მოდელებზე უფრო სწრაფი და იაფია.

Google-ის გენერალურმა დირექტორმა სუნდარ პიჩაიმ განაცხადა, რომ Gemini-ს სიჩქარე და ხელმისაწვდომი ფასი შესაძლებელს ხდის მის ფართო გავრცელებას — რაც, საბოლოოდ, სასარგებლო იქნება Google-ისთვის.

"როდესაც ადამიანები AI-ით გამდიდრებულ ფუნქციებს ჩვენს ძიებაში იყენებენ, ისინი ჩვენს ძიებასაც უფრო მეტად იყენებენ", — განაცხადა ბ-ნ პიჩაიმ სამშაბათს, Google-ის ყოველწლიური დეველოპერების კონფერენციამდე ინტერვიუში. კონფერენცია ძიებაში განხორციელებულ ცვლილებებსა და Gemini 3.5-ს დაეთმო. ეს იყო კომპანიის AI-ზე დაფუძნებული პროდუქტების თითქმის ორსაათიანი პრეზენტაცია, რომელშიც წარმოდგენილი იყო ახალი ვიდეოინსტრუმენტი, ინტერნეტ-სავაჭრო კალათა და ელფოსტების ავტონომიურად წაკითხვისა და დამუშავების სისტემა.

ამავე თემაზე: 13 მნიშვნელოვანი ტექნოლოგიური სიახლე Google I/O 2026-დან

Google-მა თანდათანობით შეამცირა კონკურენტების — OpenAI-ის მსგავსი კომპანიების — AI უპირატესობა და ლიდერობისთვის ბრძოლა დაიწყო. 2022 წელს OpenAI-ის მიერ ChatGPT-ის გამოშვების შემდეგ, Google შფოთავდა, რომ AI სტარტაპები ძიებაში მის დომინანტობას შეარყევდა. შეშფოთება კიდევ უფრო გაღრმავდა მას შემდეგ, რაც მისმა ერთ-ერთმა ადრეულმა AI პროდუქტმა ადამიანებს პიცაზე წებოს გამოყენება ურჩია.

თუმცა გასულ წელს Google-მა AI სფეროში მძიმეწონოსანი მოთამაშის სტატუსი გაიმყარა. Gemini-ს მოდელებთან ერთად, კომპანიამ AI ჩიპები აწარმოა და ასეულობით მილიარდი დოლარი ჩადო ღრუბლოვანი გამოთვლების ბიზნესისთვის განკუთვნილ მონაცემთა ცენტრებში. მის Gemini app-ს, რომელიც კოდის წერასა და კვლევას ემსახურება, ახლა 900 მილიონი აქტიური მომხმარებელი ჰყავს, რაც დაახლოებით იმდენივეა, რამდენიც ChatGPT-ის მომხმარებლები.

Google AI-ს ციფრული ეკონომიკის სულ უფრო მეტ სფეროში შესაღწევად იყენებს. ვებ-შეჯამებები მეტ ძიებას იწვევს, ხანგრძლივი მოთხოვნები მომხმარებლებზე სიღრმისეულ ინფორმაციას გვაძლევს, ხოლო ახალი სავაჭრო ფუნქციები მომხმარებლებს სავაჭრო ობიექტებთან დაკავშირებას უმარტივებს.

Arete Research-ის ფინანსური ანალიტიკოსი რიჩარდ კრეიმერი ამბობს, რომ ეს ცვლილებები Google-ს სარეკლამო შემოსავლის გაზრდაში ეხმარება. გასულ წელს Google-ის რეკლამაზე დაწკაპება 6%-ით გაიზარდა, ხოლო თითოეული დაწკაპების ფასი 7%-ით მეტი გახდა. 2022 წლიდან კომპანიის წლიური მოგება გაორმაგდა — 132 მილიარდ დოლარამდე.

"ღია ვები გაქრობის გზაზეა", — განაცხადა კრეიმერმა, გულისხმობდა რა, რომ ინტერნეტ-ტრაფიკი ახლა ხშირად იწყება და მთავრდება Google-ის ვიზიტით, სხვა საიტებზე გადასვლის გარეშე — "AI-ის გამოყენებით, Google ყველა დანარჩენის როლს უბრალო მონაცემთა მომწოდებლამდე ამცირებს".

Google-ის AI ტრანსფორმაცია განსაკუთრებით ძიების სფეროშია გამოკვეთილი. 2024 წელს, კომპანიამ შეწყვიტა ზოგიერთ მოთხოვნაზე ვებსაიტების სიით პასუხი და ამის ნაცვლად, ავტომატურად გენერირებული პასუხები — AI Overviews — გამოიყენა. გასულ წელს, AI Mode სახელით ახალი ძიების ჩანართი დაემატა, სადაც ადამიანებს შეუძლიათ ერთ თემაზე მრავალი კითხვის დასმა, ჩატბოტის მსგავსად.

Google-ის თქმით, ეს ფუნქციები ახლა გაერთიანდება. AI Overviews-ის შედეგების გამოჩენის შემდეგ, AI Mode-ში დამატებითი კითხვების დასმა გახდება შესაძლებელი, პიჩაიმ ამ ცვლილებას "გარღვევა" უწოდა.

Google ძიებაში ნერგავს AI-ის ერთ-ერთ უდიდეს მიღწევასაც — პროგრამული კოდის წერას. როდესაც ადამიანები ასტროფიზიკის მსგავს რთულ თემებს იკვლევენ, სრულყოფილი პასუხის გასაცემად Gemini-ს შეუძლია კულისებში შექმნას ინტერაქტიული გრაფიკები და სიმულაციები, რათა ადრინდელი ვებსაიტების ჩამონათვალზე უფრო ღრმა პასუხი დააბრუნოს.

ეს ფუნქცია Anthropic-ისა და OpenAI-ის ბოლო პროდუქტებს ეფუძნება, რომლებმაც შექმნეს ინსტრუმენტები, რომლებიც კოდს ავტომატურად ასრულებს და ელფოსტის, კვლევისა და საოფისე რუტინული სამუშაოს ავტომატიზაციისთვის ასისტენტებს ქმნის.

Google-მა განაცხადა, რომ Anthropic-ის Claude Code-სა და OpenAI-ის Codex-ის მიერ გამოყენებული ასისტენტების ალტერნატივას შემოგვთავაზებს. Gemini Spark სახელით ცნობილი სერვისი ინტეგრირებულია Gmail-ში, Docs-სა და სხვა Google პროდუქტებში, სადაც შეუძლია ელფოსტებსა და ჩათებში გაბნეული სხდომის ჩანაწერები ერთ დოკუმენტად გააერთიანოს. მას ასევე შეუძლია ელფოსტების წაკითხვა და დამუშავება.

Google-მა ასევე გამოაცხადა, რომ Gemini-ს ამ შემოდგომიდან სათვალეებშიც ჩართავს — Samsung Electronics-ისა და სათვალეების კომპანიების, Warby Parker-ისა და Gentle Monster-ის, პარტნიორობით. სათვალეები, რომლებიც Meta-ს Ray-Ban ჭკვიანი სათვალეების მსგავსად იმუშავებს, კამერით, მიკროფონითა და დინამიკებით იქნება აღჭურვილი, რათა მომხმარებლებმა Gemini-ს გარშემო სივრცის შესახებ კითხვები დაუსვან — მაგალითად, გაიგონ, რომელ ძეგლს შესცქერიან.