თავისუფლების მოედნის ლიდერები პრაღაში, GLOBSEC-ის ფორუმს ესწრებიან. ფორუმის ფარგლებში, ისინი მოლდოვის პრეზიდენტ მაია სანდუს შეხვდნენ. შეხვედრას ესწრობა პარტიის თავმჯდომარე ლევან ცუცქირიძე, რომელმაც განაცხადა, რომ ევროპულ გზაზე დასაბრუნებლად ისეთი მეგობრების მხარდაჭერა, ვისაც ოლიგარქიული მმართველობის დამარცხების გამოცდილებაც აქვს, მნიშვნელოვანი იქნება.

"კარგი ორმხრივი შეხვედრა გვქონდა თავისუფლების მოედანს მოლდოვის პრეზიდენტ მაია სანდუსთან. ევროპულ გზაზე დასაბრუნებლად ისეთი მეგობრების მხარდაჭერა, ვისაც ოლიგარქიული მმართველობის დამარცხების გამოცდილებაც აქვს, მნიშვნელოვანი იქნება და მათ შორის მოლდოვისა და მისი პრეზიდენტის იმედიც უნდა გვქონდეს.

პრეზიდენტი სანდუს ლიდერობით მოლდოვამ მიიღო რამდენიმე მილიარდიანი მხარდაჭერა ევროკავშირისგან და ახორციელებს სტრატეგიული მნიშვნელობის პროექტებს, როგორიცაა ხელოვნური ინტელექტის ევროპული ინფრასტრუქტურის განვითარება.

პრეზიდენტმა სანდუმ გაგვიზიარა საკუთარი მხარდაჭერა თავისუფლებისთვის მებრძოლი ქართველი ხალხის მიმართ და ისაუბრა იმ საყოველთაო სკეპტიციზმზე, რომლის გადალახვაც მან თავად შეძლო საკუთარ ქვეყანაში.

მოლდოვის და საქართველოს მომავალი უკავშირდება ევროპულ დემოკრატიულ სივრცეს და ჩვენ არ დავიღლებით, სანამ არ დავუბრუნებთ ჩვენს ქვეყანას მის კუთვნილ ადგილს ევროპის კონტინენტზე," - განაცხადა თავისუფლების მოედნის თავმჯდომარემ, ლევან ცუცქირიძემ, შეხვედრის შესახებ.