შალვა პაპუაშვილი სოციალურ ქსელში საქართველოში გერმანიის ელჩის, პეტერ ფიშერის კომენტარს პასუხობს იმის შესახებ, რომ "გერმანიის მთავრობის წუხილს და იმედგაცრუებას იწვევს ის ფაქტი, რომ საქართველომ თავისი თავი უკრაინისგან და მოლდოვისგან მოწყვიტა ევროკავშირისკენ მიმავალი გზიდან".

"ამ ადამიანს აუხსნას ვინმემ, რომ საქართველო არ აპირებს დაადგეს არც უკრაინის და არც მოლდოვის მიერ არჩეულ, ევროკავშირისკენ მიმავალ გზას, რომელზე შეყენებასაც ასე ცივსისხლიანად გვიპირებდნენ 2022 წელს.

დღეს, უკვე ყველასთვის ნათელია, რომ უკრაინის ევროკავშირისკენ მიმავალი გზა საკუთარი ტერიტორიების დათმობაზე გადის (როგორც ეს გერმანიის კანცლერმა გვამცნო), ხოლო მოლდოვის გზა - საკუთარი სახელმწიფოებრიობის გაუქმებასა და სხვა სახელმწიფოსთან მიერთებაზე (როგორც ეს მოლდოვის პრეზიდენტმა განაცხადა).

აქეთკენ გვექაჩებიან და ამას გვაგუებენ — განვიხილოთ ტერიტორიები, როგორც ტვირთი და დამოუკიდებლობა, როგორც ზედმეტი პასუხისმგებლობა, რომლის მოცილებისთანავე გაგვეხსნება ევროკავშირის კარიბჭე — სწორედ ეს არის 21-ე საუკუნის დანაელთა ძღვენი", — წერს შალვა პაპუაშვილი.

მას შემდეგ რაც ზაარბრიუკენის მერიამ გაავრცელა განცხადება თბილისთან ურთიერთობების გაწყვეტის შესახებ, თბილისის მერმა კახა კალაძემ გერმანელი ხალხის მისამართით "სამძიმრის წერილი" გამოაქვეყნა. კალაძის "სამძიმრის წერილს" "ტვ პირველის" ჟურნალისტთან საუბრისას საქართველოში გერმანიის ელჩი პეტერ ფიშერი გამოეხმაურა. მისი თქმით, "სამძიმრის წერილი ამბობს, რამდენად ცუდადაა საქმე გერმანიაში, რომელიც იმართება "დიფ სთეითის" მიერ არაფორმალური ოლიგარქების მიერ. ის ფაქტი რომ მსგავსი ნარატივების საქართველოში არსებული ამგვარი წრეებიდან მოდის, კიდევ ერთი ნიშანია იმის, რომ მთავრობას საქართველო ევროკავშირისგან შორს მიჰყავს".

• "EU-სგან საპირისპიროდ გადადგმული ნაბიჯები წუხილს და იმედგაცრუებას იწვევს გერმანიის მთავრობაში" — პეტერ ფიშერი კახა კალაძეს

"ეს გადაწყვეტილება ჯერ მიღებული არ არის, ჯერ გამოცხადდა, ეს ქალაქ ზაარბრიუკენის გადაწყვეტილებაა, ამ ქალაქს თავისი მერია ჰყავს, რომელიც დემოკრატიული არჩევნების გზითაა არჩეული. მესმის, რომ ქალაქ ზაარბრიუკენის მერიას ჰყავს გერმანიის მთავრობა, რომელიც შეშფოთებულია დემოკრატიული უკუსვლით, იმ ფაქტით, რომ საქართველოს მთავრობა ევროპას ევროკავშირისგან აშორებს, ეს სამძიმრის წერილი, რომელიც ამბობს, რამდენად ცუდადაა საქმე გერმანიაში, რომელიც იმართება "დიფ სთეითის" მიერ არაფორმალური ოლიგარქების მიერ. ის ფაქტი რომ მსგავსი ნარატივების საქართველოში არსებული ამგვარი წრეებიდან მოდის, კიდევ ერთი ნიშანია იმის, რომ მთავრობას საქართველო ევროკავშირისგან შორს მიჰყავს. დღეს ასევე პრემიერმინისტრმა გამოაქვეყნა ღია წერილი ევროკავშირის ლიდერებისადმი, რომელიც ზუსტად იმავე შინაარსისაა — ჩვენ ქართველები ვართ ნამდვილი ევროპელები, ხოლო თქვენ ყველანი ცუდები ხართ და უკან მიდიხარ, ასე ევროკავშირში ვერ შეხვალთ, ნამდვილად ვერა. ეს რჩევა შეგიძლიათ მიიღოთ ჩემგან, როგორც ევროკავშირის წევრი სახელმწიფოების ელჩისგან. მე ვერ ვხედავ ნაბიჯებს წინ, მე ვხედავ საპირისპირო მიმართულებით, ევროკავშირისგან გადადგმულ ნაბიჯებს. ეს წუხილს და იმედგაცრუებას იწვევს გერმანიის მთავრობაში, რომ საქართველომ თავისი თავი უკრაინისგან და მოლდოვასგან მოწყვიტა ევროკავშირისკენ მიმავალი გზიდან. ჩვენ გვინდა, რომ ეს სამი სახელმწიფო ერთად დაწინაურდეს რაც შეიძლება სწრაფად, მაგრამ ეს ასე არ ხდება", —განაცხადა პეტერ ფიშერმა ("ტვ პირველის" თარგმანი).