ემილია კლარკმა Game of Thrones-ის გადაღებების პერიოდში ორი უმძიმესი თავის ტვინის სისხლჩაქცევა გადაიტანა.

"უბრალოდ მჯეროდა, რომ სიკვდილს დროებით ხელიდან დავუსხლტი, მაგრამ ბოლოს მაინც სიკვდილისთვის ვიყავი განწირული", — ამბობს 39 წლის ემილია კლარკი, — "ყოველდღე მხოლოდ ამაზე ვფიქრობდი".

ემილია კლარკი Game of Thrones-ში დეინერის ტარგარიენის როლს 2011-დან 2019 წლამდე ასრულებდა. პირველი სისხლჩაქცევა კი სწორედ სერიალის პირველი სეზონის დასრულებისთანავე დაემართა. მისი თქმით, ცხოვრებასა და კარიერაში მომხდარმა უეცარმა ცვლილებებმა ის საშინლად დასტრესა, რის გამოც ლონდონის ერთ-ერთ სპორტდარბაზში, ვარჯიშის დროს გონება დაკარგა.

"თითქოს ტვინში რაღაც გაწყდა და საშინელი, აუტანელი ზეწოლა დაგეწყო", — ასე აღწერს ემილია კლარკი თავის იმჟამინდელ მდგომარეობას.

სასწრაფო დახმარების მოლოდინში, გონება რომ არ დაეკარგა, საკუთარ თავს გამუდმებით უმეორებდა, რომ მსახიობი იყო, საოცნებო როლი ახალი მიღებული ჰქონდა და ყველაფერზე მეტად მისი შენარჩუნება სურდა. თავიდან ექიმებს დიაგნოზის დასმა გაუჭირდათ, ახალგაზრდა ასაკის გამო კი, პირველ რიგში ნარკოტიკების მიღება იეჭვეს.

ფოტო: WireImage

სისხლჩაქცევის შემდეგ, პირველი კვირების განმავლობაში მსახიობი HBO-ს ხელმძღვანელებსა და სერიალის შემქმნელებს თავის გამოჯანმრთელებაში არწმუნებდა.

"საშინლად მრცხვენოდა იმის გამო, რაც დამემართა. მეშინოდა, რომ ადამიანები, რომლებმაც როლზე დამამტკიცეს, სუსტად ჩამთვლიდნენ ან იფიქრებდნენ, რომ ჩემი გატეხა ადვილი იყო", — დასძინა ემილიამ.

მოგვიანებით, როდესაც მსახიობი ნიუ-იორკში გადავიდა საცხოვრებლად, მეორე ანევრიზმა დაემართა. ექიმებმა ის ჯერ კიდევ პირველი სისხლჩაქცევის მკურნალობისას აღმოაჩინეს და მას შემდეგ რეგულარულად აკვირდებოდნენ.

"ემოციურად საერთოდ ჩავიკეტე. ეს იყო ყველაზე დიდი დარტყმა, რაც მეორე სისხლჩაქცევამ მომაყენა", — ამბობს ემილია კლარკი, — "საკუთარ თავს საერთოდ არ ვუვლიდი და არ ვინდობდი. სულ იმას ვუმტკიცებდი ჩემს თავს, რომ ეს ჩემი პირადი მარცხი იყო".