საერთაშორისო ოლიმპიურმა კომიტეტის (IOC) აღმასრულებელმა კომისიამ, ხუთშაბათს, საერთაშორისო სპორტულ ფედერაციებსა და ტურნირის ორგანიზატორებს მოუწოდა, ბელარუსს საერთაშორისო ასპარეზზე დაბრუნების უფლება მისცენ. ამით ბელარუს სპორტსმენებს შესაძლებლობა ექნებათ თავიანთი ქვეყნის სახელით მიიღონ მონაწილეობა, მათ შორის ლოს-ანჯელესის 2028 წლის ზაფხულის ოლიმპიურ თამაშებზე. ინფორმაციას Reuters ავრცელებს.

საერთაშორისო ოლიმპიური კომიტეტის რეკომენდაციით, რუსი და ბელარუსი სპორტსმენები და ოფიციალური პირები 2022 წლიდან, რუსეთის უკრაინაში სრულმასშტაბიანი ომის დაწყების საპასუხოდ არიან მოკვეთილები.

"ჩვენმა საბჭომ მიიღო მკაფიო გადაწყვეტილება, რომ მხოლოდ სამშვიდობო მოლაპარაკებებისკენ გადადგმული ხელშესახები ნაბიჯების შემთხვევაში დაიწყებს თავისი გადაწყვეტილებების გადახედვას. ყველას იმედი გვაქვს, რომ ეს მალე მოხდება, თუმცა მანამდე საბჭო ერთიანია 2022 წლის მარტში მიღებული გადაწყვეტილების მხარდაჭერაში, რომელიც 2023 და 2025 წლებშიც დადასტურდა."

ბელარუსის საგარეო საქმეთა სამინისტრო და ქვეყნის ეროვნული ოლიმპიური კომიტეტი მიესალმება ამ გადაწყვეტილებას.

„საერთაშორისო ტურნირებსა და ოლიმპიურ თამაშებში ეროვნული დროშითა და ჰიმნით მონაწილეობის უფლება აღდგენილია,“ — ციტირებს სახელმწიფო საინფორმაციო სააგენტო BelTA საგარეო უწყების სიტყვებს.

ეროვნულმა ოლიმპიურმა კომიტეტმა მადლობა გადაუხადა IOC-ის პრეზიდენტს, კირსტი კოვენტრის მისი "გაწონასწორებული და პრინციპული პოზიციისთვის" და ეს მოვლენა ქვეყნის თითოეული სპორტსმენისთვის "დიდი ხნის ნანატრ ამბად" შეაფასა.

უკრაინის ოლიმპიურმა კომიტეტმა გააპროტესტა აღნიშნული გადაწყვეტილება და განაცხადა, რომ ეს ეწინააღმდეგება სამართლიანობის, პასუხისმგებლობისა და ოლიმპიურ ფუნდამენტურ ღირებულებებს.

"ბელარუსის ტერიტორია გამოიყენება უკრაინის ქალაქებზე რაკეტებისა და თავდამსხმელი დრონების გასაშვებად, ასევე სამხედრო ლოგისტიკისა და რუსული არმიის მხარდასაჭერად. სამხედრო და ჰუმანიტარულ კონტექსტში არ შეცვლილა არაფერი, რაც საფუძველი გახდებოდა ბელარუსის წარმომადგენლების საერთაშორისო სპორტულ ღონისძიებებში ეროვნული სიმბოლიკით დაბრუნებისთვის," — ნათქვამია მათ განცხადებაში.

საერთაშორისო ოლიმპიურმა კომიტეტმა განმარტა, რომ შეზღუდვების მოხსნა ამ ეტაპზე არ გავრცელდება რუს სპორტსმენებზე, თუმცა გაიზარდა ვარაუდები, რომ მსგავსი გადაწყვეტილება რუსეთის მიმართაც შეიძლება იქნას მიღებული უახლოეს თვეებში.

"ჩვენი კომპეტენცია სპორტია და უნდა გავარკვიოთ, რას ნიშნავს ეს. ჩვენ გვსურს, რომ ყველა სპორტსმენს შეეძლოს მონაწილეობა და ვფიქრობ, ეს გადაწყვეტილება ამას ადასტურებს," — განაცხადა კოვენტრიმ პრესკონფერენციაზე.

IOC-მა 2025 წლის დეკემბერში მოუწოდა ფედერაციებს, დაეშვათ რუსი და ბელარუსი ახალგაზრდა სპორტსმენები (23 წლამდე) საერთაშორისო ღონისძიებებზე ყოველგვარი შეზღუდვის გარეშე, რაც სანქციების შემსუბუქებისკენ გადადგმული პირველი მკაფიო ნაბიჯი იყო.

BBC-ის ცნობით, მსოფლიო მძლეოსნობის ფედერაციამ უარი თქვა საერთაშორისო ოლიმპიური კომიტეტის ზემოაღნიშნული რეკომენდაციის შესრულებაზე.