პარტია ქართული ოცნება — დემოკრატიული საქართველოს დაარსებიდან 14 წლის იუბილესთან დაკავშირებით, თბილისის მერმა, კახა კალაძემ სოციალურ ქსელში განცხადება გაავრცელა და პარტიის მხარდამჭერებს მადლობა გადაუხადა.

მისი თქმით, ივანიშვილის მიერ დაფუძნებულმა პარტიამ საქართველოს განვითარებაში გარდამტეხი როლი შეასრულა.

"2012 წლის 21 აპრილი, თარიღი, რომლითაც ქვეყნის პოლიტიკურ ცხოვრებაში ახალი ეტაპი დაიწყო. ბიძინა ივანიშვილის მიერ დაფუძნებულმა პოლიტიკურმა გაერთიანებამ — ქართული ოცნება — დემოკრატიული საქართველო, ქართველ ხალხთან ერთად, შეძლო დამნაშავე პოლიტიკური რეჟიმის დამარცხება და საქართველოს სახელმწიფოს განვითარებაში გარდამტეხი როლის შეტანა. ეს არ იყო უბრალოდ ახალი პოლიტიკური ძალის გამოჩენა, ეს იყო ქართველი ხალხის იმედი და მტკიცე მოთხოვნა მშვიდობიან, სტაბილურ მომავალზე, ისეთ სახელმწიფოდ ჩამოყალიბებაზე, სადაც გადამწყვეტი სიტყვა ეკუთვნის საქართველოს მოსახლეობას.

ქართულმა ოცნებამ ამომრჩევლის ეს მოთხოვნა სამოქმედო გეგმად და მთავარ პრინციპად აქცია, რომლისთვისაც არასდროს გადაუხვევია, რაშიც ყველაზე დიდი წვლილი მის დამფუძნებელს, ბატონ ბიძინა ივანიშვილს მიუძღვნის," — განაცხადა კალაძემ.

მისივე შეფასებით, გასული 14 წლის განმავლობაში გატარებულმა პოლიტიკამ ქვეყანაში უზრუნველყო მშვიდობა, ეკონომიკური სტაბილურობა და სახელმწიფოსა და მოქალაქეების ინტერესების დაცვა.

"მშვიდობა, ეკონომიკური სტაბილურობა, სახელწიფოს და საქართველოს მოსახლეობის ინტერესების ხელშეუხებლობა, ქართული ეკლესიის, ჩვენი ტრადიციების, კულტურის დაცვა, — ეს ქართული ოცნების 14 წლიანი პოლიტიკის შედეგია," — აღნიშნა თბილისის მერმა.


განცხადების ბოლოს კი მან პარტიის წევრებსა და მხარდაჭერებს მილოცვით მიმართა და ერთგულებისთვის მადლობა გადაუხადა.

"ვულოცავ ქართული ოცნების დიდ ოჯახს და მის მხარდამჭერებს დღევანდელ დღეს. მადლობა საქართველოს ერთგულებისთვის!," — განაცხადა მან სოციალურ ქსელში.