საპარლამენტო უმრავლესობის წევრი არჩილ გორდულაძე "პირველი არხის" ეთერში გამოეხმაურა ქართულ ოცნებაში განხორციელებულ საკადრო ცვლილებებს. მისი თქმით, "მამუკა მდინარაძე დააკლდა საჯარო პოლიტიკას და საჯარო პოლიტიკაში მისი დაბრუნება სხვა ძალებით აღავსებს ჩვენს ["ოცნების"] გუნდს.

"ბევრი სუბიექტური და კიდევ უფრო მეტი ობიექტური გარემოებიდან გამომდინარე, დიდ წარმატებას ვუსურვებ მამუკა მდინარაძეს. როდესაც არსებობს სისტემა, რომელიც არის არსებითად სხვა რელსებზე გადასული, როდესაც სუს-მა დაიწყო ბევრი რეფორმა და პირადად მამუკა მდინარაძე ხელმძღვანელობდა ამ ყველაფერს, ის განსაკუთრებით გამორჩეულია სახელმწიფოს წინააღმდეგ მიმართული დანაშაულების აღკვეთაში, კორუფციის წინააღმდეგ ბრძოლაში, მაშინ მნიშვნელოვანია, რომ ამ ადამიანმა იკისროს ის პასუხისმგებლობა, რომელსაც ჰქვია მთლიანად სამართალდამცავი ორგანოების სისტემის წაძღოლა. მამუკა მდინარაძე დააკლდა საჯარო პოლიტიკას და საჯარო პოლიტიკაში მისი დაბრუნება სხვა ძალებით აღავსებს ჩვენს გუნდს, მეტად გააძლიერებს პოლიტიკურ სივრცესაც", — განაცხადა გორდულაძემ.

ცნობისათვის ქართულ ოცნებაში საკადრო ცვლილებები განხორციელდა. ამის შესახებ ბრიფინგზე ირაკლი კობახიძემ განაცხადა. მისი თქმით, შს მინისტრმა გეკა გელაძემ სუს-ის უფროსის პოსტზე მამუკა მდინარაძე ჩაანაცვლა. თავის მხრივ — სუს-ის უფროსი მამუკა მდინარაძე სამართალდამცავი ორგანოების კოორდინაციის საკითხებში სახელმწიფო მინისტრად დაინიშნება და ვიცეპრემიერობასაც შეითავსებს. შს მინისტრის კი პოსტს აჭარის ავტონომიური რესპუბლიკის მთავრობის თავმჯდომარე სულხან თამაზაშვილი დაიკავებს.

არჩილ გორდულაძემ განმარტა ის პროცედურები, რაც ახალი სახელმწიფო მინისტრის დამტკიცებისთვისაა საჭირო. თქმით, სახელმწიფო მინისტრის ახალი თანამდებობის შესახებ საკანონმდებლო ინიციატივას პარლამენტი მომავალ კვირაში დაამტკიცებს.

"ჯერ პროცედურულად არის საჭირო, რომ საპროცედურო საკითხთა კომიტეტის სხდომა ჩატარდეს და დასკვნა დაიწეროს სუს-ის ხელმძღვანელის გადადგომის ნამდვილობის თაობაზე. შემდეგ ეს ყველაფერი წარედგინება პლენარულ სხდომას, ცნობად იქნება მიღებული. შემდეგ უკვე ჩატარდება თავდაცვის და უშიშროების კომიტეტის სხდომა, სადაც განიხილება კანდიდატი. შემდეგ – ბიურო, შემდეგ – პლენარული სხდომა და უკვე პლენარული სხდომა დაამტკიცებს ახალ კანდიდატს. სახელმწიფო უსაფრთხოების სამსახურის უფროსი თანამდებობიდან გადამდგარად ითვლება მას შემდეგ, რაც საქართველოს პარლამენტის პლენარული სხდომა ამ საკითხს ცნობად მიიღებს.

რაც შეეხება ახალი სახელმწიფო მინისტრის საკითხს, გორდულაძის თქმით, მოხდება საკანონმდებლო ცვლილებების სამი მოსმენით მიღება, პრეზიდენტის ხელმოწერისა და გამოქვეყნების შემდეგ, დღის ბოლო შევა ძალაში. უკვე შემდეგ დღეს იქნება შესაძლებელი, რომ დაინიშნოს მამუკა მდინარაძე ახალ თანამდებობაზე", – განაცხადა გორდულაძემ.