პრეზიდენტ დონალდ ტრამპის ადმინისტრაციის მიერ მიღებული დროებითი საგამონაკლისო რეჟიმის ვადის ამოწურვის შემდეგ, რუსულ ნავთობზე დაწესებული აშშ-ის სანქციები კვლავ სრულად ამოქმედდა", — ამის შესახებ ინფორმაციას Politico ავრცელებს.

შეგახსენებთ, 11 აპრილს აშშ-ის სანქციების ფარგლებში მოქმედი 30-დღიანმა საშეღავათო ვადა ამოიწურა. აღნიშნული საგამონაკლისო რეჟიმი გასულ თვეში ირანში მიმდინარე საომარი მოქმედებებით გამოწვეული ნავთობის მიწოდების დეფიციტის გამო ამოქმედდა.

აშშ-ის ხაზინის დეპარტამენტს Politico-ს კითხვებისთვის პირდაპირ არ უპასუხია, თუმცა მიუთითა ხაზინის მდივნის, სკოტ ბესენტის განცხადებაზე. ბესენტმა რუსეთისთვის სანქციების დროებით შემსუბუქებას "ვიწროდ მიზნობრივი და მოკლევადიანი ღონისძიება" უწოდა.

აშშ-ის სენატში არსებული წყაროები აღნიშნავენ, რომ საგამონაკლისო რეჟიმის დასრულება "ზეიმის საფუძველი ნაკლებადაა", რადგან რუსეთი ნავთობის რეალიზაციისათვის კვლავ წარმატებით იყენებს ალტერნატიულ მარშრუტებს.

"სანამ ლიცენზია გაიცემოდა, სანქცირებული რუსული ნავთობი ბაზარზე გზას მაინც პოულობდა, რადგან ტრამპის ადმინისტრაციას ერთ წელზე მეტია, არ დაუწესებია საპასუხო სანქციები — იქნება ეს ნავთობის გაყიდვები თუ კრემლის სამხედრო მანქანისთვის საჭირო კრიტიკული შესყიდვები" — განაცხადა სენატის ერთ-ერთმა დემოკრატმა თანაშემწემ ანონიმურობის დაცვით.

ვაშინგტონმა რუსეთის წინააღმდეგ სანქციების შემსუბუქება ნავთობზე გლობალური ფასების ზრდით გაამართლა. მასზე ფასების მკვეთრი მატება გამოიწვია აშშ-ისა და ისრაელის ომმა ირანის წინააღმდეგ და ამ უკანასკნელის თავდასხმებმა სპარსეთის ყურის ქვეყნებზე, რამაც რეგიონიდან ნავთობის ექსპორტი ფაქტობრივად პარალიზებული გახადა. ანალოგიური გადაწყვეტილებები იქნა მიღებული ვენესუელურ და ირანულ ნავთობთან მიმართებითაც.

აშშ-ის ხაზინის მდივანმა, სკოტ ბესენტმა მოგვიანებით განაცხადა, რომ სანქციების შემსუბუქების შედეგად მოსკოვის მიერ მიღებული მოგება იქნებოდა "უმნიშვნელო" და დაახლოებით 2 მილიარდ აშშ დოლარს შეადგენდა.

პარალელურად, აშშ-ის პრეზიდენტმა დონალდ ტრამპმა არაერთხელ აღნიშნა, რომ ჰორმუზის სრუტე საბოლოოდ მაინც გაიხსნება. პარასკევს მან კვლავ დაადასტურა, რომ ეს "საკმაოდ მალე" მოხდება.