ჩაპელ როუნმა ბოდიში მოუხადა ჩელსისა და არსენალის ყოფილ ფეხბურთელ ჟორჟინიოს მას შემდეგ, რაც სპორტსმენმა მომღერალი და მისი დაცვის გუნდი "ზედმეტად აგრესიული ქცევის" გამო გააკრიტიკა. ჟორჟინიოს თქმით, მომხდარის გამო, მისმა 11 წლის ქალიშვილმა იტირა.

34 წლის ჟორჟინიო ამჟამად სამშობლოში, ბრაზილიურ ფლამენგოში თამაშობს. შაბათს მან განაცხადა, რომ მისმა შვილმა სან-პაულუს სასტუმროში როუნის გვერდით ჩაიარა, რათა დარწმუნებულიყო, ნამდვილად ის იყო თუ არა, რა დროსაც მას მომღერლის დაცვა დაუპირისპირდა.

ფოტო: Getty Images

ინსტაგრამზე გამოქვეყნებულ პოსტში ჟორჟინიომ მომხდარს "ძალიან დასანანი სიტუაცია" უწოდა და აღნიშნა, რომ მისი ქალიშვილი "აშკარად შეშინებული იყო და ბევრს ტიროდა". ფეხბურთელის პოსტი ინციდენტის შესახებ ინტერნეტში ვირუსულად გავრცელდა.

კვირას როუნმაც გამოაქვეყნა ინსტაგრამზე ვიდეო, სადაც ინციდენტის ეპიცენტრში მყოფი დაცვის თანამშრომელი გააკრიტიკა და დედა-შვილს ბოდიში მოუხადა.

"ყველაზე ცუდი ის არის, რომ ის [შვილი] მომღერალს არც კი მიახლოებია", — ეწერა ჟორჟინიოს თავდაპირველ პოსტში — "მან უბრალოდ მომღერლის მაგიდას ჩაუარა, შეხედა, რომ დარწმუნებულიყო მის ვინაობაში, გაიღიმა და დედასთან დაბრუნდა. მას არაფერი უთქვამს და არაფერი უთხოვია. ის, რაც შემდეგ მოხდა, სრულიად არაადეკვატური იყო.

საუზმისას მათ მაგიდასთან დაცვის თანამშრომელი მივიდა და ჩემს მეუღლესა და შვილს უკიდურესად აგრესიულად დაუწყო ლაპარაკი. ეუბნებოდა, რომ დედას არ უნდა მიეცა ბავშვისთვის უფლება, სხვებისთვის "პატივი არ ეცა" ან "შეეწუხებინა".

სასტუმროში მათ წინააღმდეგ საჩივრითაც კი დაემუქრა, სანამ ჩემი 11 წლის შვილი იჯდა და ტიროდა".

როუნმა ვიდეომიმართვაში თქვა: "მინდა მოგიყვეთ ისტორიის ჩემი ვერსია იმაზე, რაც დღეს მოხდა დედასა და შვილს შორის და დაცვის თანამშრომელს შორის, რომელიც არ არის ჩემი პირადი დაცვის წევრი.

მე არც კი დამინახავს ქალი და ბავშვი. ჩემთან არავინ მოსულა. არავის შევუწუხებივარ. უბრალოდ სასტუმროში ვსაუზმობდი და ვფიქრობ, ეს ხალხიც ამავე სასტუმროში ცხოვრობდა.

მე არ მითხოვია დაცვისთვის, რომ ამ დედა-შვილთან მისულიყო და დალაპარაკებოდა. არა. ისინი ჩემთან არ მოსულან. არაფერს აკეთებდნენ. უსამართლობაა დაცვის მხრიდან იმის დაშვება, რომ ვიღაცას ცუდი განზრახვა აქვს, როცა ამის საბაბი არ არსებობს, რადგან არანაირი ქმედება არ განხორციელებულა.

მე არ მძულს ჩემი მუსიკის ფანები და არ მძულს ბავშვები. ეს სიგიჟეა. ბოდიშს ვუხდი დედასა და შვილს. ვიღაცამ რაღაც არასწორად ივარაუდა და თუ თავი უხერხულად იგრძენით, ეს ძალიან მასევდიანებს. თქვენ ეს არ დაგიმსახურებიათ".

ფოტო: Getty Images

ჟორჟინიომ, იტალიის ნაკრების ყოფილმა წევრმა, რომელიც გასულ ზაფხულს სათამაშოდ მშობლიურ ბრაზილიაში გადავიდა, დასძინა, რომ როგორც ფეხბურთელი, ის შეჩვეულია საჯაროობას და, შესაბამისად, ესმის "პატივისცემისა და საზღვრების" მნიშვნელობა.

მის პოსტში ასევე ეწერა: "სამწუხაროა ასეთი მოპყრობის ნახვა მათგან, ვისაც ყველაზე კარგად უნდა ესმოდეს ფანების მნიშვნელობა. საბოლოო ჯამში, სწორედ ისინი ქმნიან ყოველივე ამას. გულწრფელად ვიმედოვნებ, რომ ეს დაფიქრების საბაბი გახდება. არავინ უნდა გაიაროს ეს, მით უმეტეს ბავშვმა. @chappellroan. შენი ფანების გარეშე შენ არაფერი იქნებოდი. ხოლო ფანებს ვეტყვი: ის თქვენს სიყვარულს არ იმსახურებს".

ამბავს რიო-დე-ჟანეიროს მერიც გამოეხმაურა, რომელმაც ამერიკელი მომღერალი გააკრიტიკა და განაცხადა, რომ 28 წლის შემსრულებელს არ მისცემს უფლებას მონაწილეობა მიიღოს პროექტში Todo Mundo no Rio (საერთაშორისო მუსიკალური მეგაშოუების სერია, რომელსაც რიოს მერია უწევს ორგანიზებას).

მან თქვა: "სანამ მე ვხელმძღვანელობ ჩვენს ქალაქს, ეს ახალგაზრდა ქალბატონი (როუნი) არასოდეს გამოვა Todo Mundo no Rio-ზე. ეჭვი მეპარება, შაკირას მსგავსი რამ გაეკეთებინა! სხვათა შორის, ჟორჟინიო, შენი პატარა მაისის ღონისძიების საპატიო სტუმარი უკვე არის". ჟორჟინიომ მერის პოსტს X-ზე გულის ემოჯით უპასუხა.