აზერბაიჯანის სახელმწიფო უსაფრთხოების სამსახურმა (DTX) განაცხადა, რომ აღკვეთა ირანის
"ისლამური რევოლუციის გუშაგთა კორპუსის" (IRGC) მიერ დაგეგმილი მრავალმხრივი ტერორისტული თავდასხმა, რომელიც მოიცავდა შესაძლო დარტყმებს კრიტიკულად მნიშვნელოვან ბაქო-თბილისი-ჯეიჰანის (BTC) მილსადენზე. ინფორმაციას OC media ავრცელებს.

ეს ბრალდებები ორი დღით ადრე აზერბაიჯანის ექსკლავ ნახიჩევანზე ირანული დრონების იერიშს მოჰყვა. სახელმწიფო უსაფრთხოების სამსახურის (DTX) განცხადებით, შეთქმულება ორგანიზებული იყო IRGC-ის მიერ და მიზნად ისახავდა თავდასხმას აზერბაიჯანის მთიელ ებრაელთა თემის წევრებზე, ბაქოში ისრაელის საელჩოსა და სინაგოგაზე.

OC media წერს, რომ შეთქმულების მონაწილეებს შორის იყო ირანისა და აზერბაიჯანის რამდენიმე მოქალაქე, რომლებიც ქვეყანაში ასაფეთქებელი ნივთიერებების შემოტანის შემდეგ დააკავეს. ერთ-ერთმა პირმა, ირანის მოქალაქემ, საჯად მოღადამ სათი სოფი ევად შეიხზადემ, გავრცელებული ინფორმაციით, "მიიღო სპეციალური ინსტრუქციები IRGC-სგან აზერბაიჯანში მცხოვრები ებრაელი პირების მკვლელობის გეგმების მოსამზადებლად", — აცხადებს DTX.

ამ შეთქმულებასთან დაკავშირებული სულ მცირე 10 პირია იდენტიფიცირებული, მათ შორის IRGC-ის დაზვერვის პოლკოვნიკი ალი ასღარ ბორდბარ შერამი, რომელიც უშუალოდ ხელმძღვანელობდა ოპერაციებს. ოთხ პირს — აზერბაიჯანის მოქალაქეებს: თარხან თარლან გულიევს, ნიჯათ ზამან აღაევს, ასად თოფიქ აბდულაევსა და რაშად ფარჰად რუსტამოვს — უკვე მიესაჯათ ექვსი წლითა და ექვსი თვით თავისუფლების აღკვეთა. კიდევ სამ პირს — ნარმინა რამიზ შაბანოვას, ნაიბ აგაისმი ისმიევსა და ელვინ ბაჰრუზ აჰმადოვს — შეთქმულებასთან დაკავშირებულ სხვადასხვა დანაშაულში ბრალი წაუყენეს. DTX-ის ცნობით, დაკავებულმა აზერბაიჯანელებმა პოლიციას აღიარებითი ჩვენებები მისცეს.

გარდა ამისა, ძებნილთა სიაში შეიყვანეს ირანის ოთხი მოქალაქე: იასერ რაჰიმ ზანდკიანი, ბეჰნამ საჰიბალი რუსტამზადა, ჰოსეინ სავარ საბერ აზარუნდბილეჰი და საჯად მოღადამ სათი სოფი ევად შეიხზადე.