ოცნების ხელისუფლების განათლების მინისტრის, გივი მიქანაძის განცახდებით, წელს, გამონაკლისის სახით, სკოლაში დარეგისტრირების შესაძლებლობა მიეცემათ ბავშვებს, რომელთაც 6 წელი 31 დეკემბრის ჩათვლით უსრულდებათ.

"პრემიერმინისტრ ირაკლი კობახიძესთან კონსულტაციის საფუძველზე მიღებული იქნა გადაწყვეტილება — საგამონაკლისო წესით, ერთჯერადად, 2026-2027 სასწავლო წელს პირველ კლასში დარეგისტრირების შესაძლებლობა მიეცემათ ბავშვებს, რომელთაც 31 დეკემბრის ჩათვლით უსრულდებათ 6 წელი.

ჩვენთვის პრინციპულად მნიშვნელოვანია საზოგადოების, ჩვენი მოქალაქეების აზრის მოსმენა და გათვალისწინება. იცით, რომ რეფორმის ეროვნული კონცეფციის წარდგენა და დაანონსება 2025 წლის დეკემბერში მოხდა, შესაბამისად, შევეცადეთ, გარდამავალი პერიოდი ყოფილიყო მაქსიმალურად გამარტივებული სასკოლო საზოგადოებისთვის.
მშობელთა უმეტესობა უკვე აწარმოებდა მოლაპარაკებებს კონკრეტულ სკოლებთან და ბავშვებს ამზადებენ პირველი კლასისთვის. აქედან გამომდინარე, ჩვენ პრიორიტეტად დავაყენეთ მშობელთა საუკეთესო ინტერესები,“ — განაცხადა "ოცნების" განათლების მინისტრმა, გივი მიქანაძემ.

შეგახსენებთ, მშობლები "ზოგადი განათლების შესახებ" კანონში შეტანილ ცვლილებს აპროტესტებდნენ, რომლის თანახმადაც 15 სექტემბრის შემდეგ დაბადებული ბავშვები სკოლაში შესვლას ვეღარ შეძლებდნენ.

მშობლების განმარტებით, აღნიშნული გადაწყვეტილება ქართული ოცნების პარლამენტმა ნაჩქარევად მიიღო — იმ დროს, როდესაც მოსწავლეთა რეგისტრაცია 2 კვირაში დაიწყო და ბავშვები და ოჯახები რეალურად მზად იყვნენ სწავლის დასაწყებად. აღნიშნულ საკითხზე პარლამენტში პეტიციაც შეიტანეს, თუმცა უარი მიიღეს.