ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში კაია კალასმა ევროკავშირის წევრი სახელმწიფოების სახელით ახლო აღმოსავლეთში განვითარებულ მოვლენებთან დაკავშირებით განცხადება გაავრცელა.

განცხადებაში აღნიშნულია, რომ ევროკავშირი "შეშფოთებით ადევნებს თვალს ირანსა და ახლო აღმოსავლეთში მიმდინარე მოვლენებს" და მათივე განმარტებით, ევროკავშირი ირანს მოუწოდებს, შეწყვიტოს ბირთვული პროგრამა, შეზღუდოს ბალისტიკური რაკეტების პროგრამა, თავი შეიკავოს დესტაბილიზაციისკენ მიმართული აქტივობებისგან რეგიონსა და ევროპაში და დაასრულოს შემზარავი ძალადობა და რეპრესიები საკუთარი ხალხის წინააღმდეგ.

ასევე, როგორც განცხადებაშია აღნიშნული, რომ მჭიდრო კავშირში რჩებიან რეგიონის პარტნიორებთან, რათა პროცესების დეესკალაციას შეუწყონ ხელი.

"ევროკავშირი უდიდესი შეშფოთებით ადევნებს თვალს ირანსა და ახლო აღმოსავლეთში მიმდინარე მოვლენებს. ირანის ხელისუფლების ქმედებების საპასუხოდ, ევროკავშირმა ფართომასშტაბიანი სანქციები დააწესა — იქნება ეს ირანელი ხალხის წინააღმდეგ მიმართული სასტიკი რეპრესიები და ადამიანის უფლებების დარღვევა, თუ რეგიონული, ევროპული და საერთაშორისო უსაფრთხოებისთვის შექმნილი საფრთხეები, რაც ირანის ბალისტიკური რაკეტებისა და ბირთვული პროგრამებით, ასევე ახლო აღმოსავლეთში შეიარაღებული ჯგუფების მხარდაჭერით გამოიხატება. ჩვენ კვლავაც გავაგრძელებთ ევროკავშირის უსაფრთხოებისა და ინტერესების დაცვას, მათ შორის დამატებითი სანქციების მეშვეობით. ევროკავშირი თანმიმდევრულად მოუწოდებს ირანს, შეწყვიტოს ბირთვული პროგრამა, შეზღუდოს ბალისტიკური რაკეტების პროგრამა, თავი შეიკავოს დესტაბილიზაციისკენ მიმართული აქტივობებისგან რეგიონსა და ევროპაში და დაასრულოს შემზარავი ძალადობა და რეპრესიები საკუთარი ხალხის წინააღმდეგ.

ჩვენ მხარეებს მაქსიმალური თავშეკავებისკენ, მშვიდობიანი მოსახლეობის დაცვისა და საერთაშორისო სამართლის, მათ შორის გაეროს წესდების პრინციპებისა და საერთაშორისო ჰუმანიტარული სამართლის სრული პატივისცემისკენ მოვუწოდებთ. ნებისმიერი გაჭიანურებული ომით ახლო აღმოსავლეთი დიდ ზარალს ნახავს. ირანის თავდასხმები და რეგიონის არაერთი ქვეყნის სუვერენიტეტის დარღვევა დაუშვებელია. ირანმა თავი უნდა შეიკავოს განურჩეველი სამხედრო დარტყმებისგან. ჩვენ სოლიდარობას ვუცხადებთ რეგიონულ პარტნიორებს, რომლებიც თავდასხმის მსხვერპლნი გახდნენ ან დაზარალდნენ. ჩვენ კიდევ ერთხელ ვადასტურებთ ჩვენს ერთგულებას რეგიონული სტაბილურობისა და მშვიდობიანი მოსახლეობის სიცოცხლის დაცვის მიმართ.

ჩვენ მჭიდრო კავშირში ვრჩებით რეგიონის პარტნიორებთან, რათა ხელი შევუწყოთ დეესკალაციას. ევროკავშირი და მისი წევრი ქვეყნები კვლავაც მტკიცედ უჭერენ მხარს რეგიონული უსაფრთხოებისა და სტაბილურობის დაცვას. ევროკავშირი გააგრძელებს მონაწილეობას ყველა დიპლომატიურ ძალისხმევაში დაძაბულობის შესამცირებლად და მდგრადი გადაწყვეტის მოსაძებნად, რათა ირანს ბირთვული იარაღის შექმნის შესაძლებლობა არ მიეცეს. გადამწყვეტი მნიშვნელობა აქვს ირანის სრულ თანამშრომლობას ატომური ენერგიის საერთაშორისო სააგენტოსთან (IAEA), ასევე ირანის მიერ ბირთვული იარაღის გაუვრცელებლობის ხელშეკრულებითა და გარანტიების ყოვლისმომცველი შეთანხმებით ნაკისრი სამართლებრივი ვალდებულებების შესრულებას; ბირთვული უსაფრთხოება კრიტიკული პრიორიტეტია. ასევე უდიდესი მნიშვნელობა ენიჭება საზღვაო უსაფრთხოების შენარჩუნებას და ნავიგაციის თავისუფლების პატივისცემას", — წერია განცხადებაში.

კაია კალასი ასევე განმარტავს, რომ საჭიროების შემთხვევაში, ევროკავშირი სამოქალაქო დაცვის მექანიზმს გააქტიურებს. განცხადებაში ხაზგასმულია ისიც, რომ ირანში მიმდინარე მოვლენებმა არ უნდა გამოიწვიოს ესკალაცია, რომელიც საფრთხეს შეუქმნის ახლო აღმოსავლეთს, ევროპასა და მის ფარგლებს გარეთ არსებულ ტერიტორიებს.

"ევროკავშირი და მისი წევრი ქვეყნები იღებენ ყველა საჭირო ზომას რეგიონში ევროკავშირის მოქალაქეების უსაფრთხოების უზრუნველსაყოფად, მათ შორის, საჭიროების შემთხვევაში, ევროკავშირის სამოქალაქო დაცვის მექანიზმის გააქტიურებით.

ირანში მიმდინარე მოვლენებმა არ უნდა გამოიწვიოს ესკალაცია, რომელიც საფრთხეს შეუქმნის ახლო აღმოსავლეთს, ევროპასა და მის ფარგლებს გარეთ არსებულ ტერიტორიებს, რასაც შესაძლოა არაპროგნოზირებადი შედეგები მოჰყვეს, მათ შორის ეკონომიკურ სფეროში. თავიდან უნდა იყოს აცილებული კრიტიკული მნიშვნელობის საწყალოსნო გზების, მაგალითად, ჰორმუზის სრუტის შეფერხება.

ევროკავშირი კიდევ ერთხელ უცხადებს სოლიდარობას ირანელ ხალხს და მტკიცედ უჭერს მხარს მათ ფუნდამენტურ მისწრაფებას ისეთი მომავლისკენ, სადაც მათი საყოველთაო ადამიანის უფლებები და ძირითადი თავისუფლებები სრულად იქნება დაცული", — აღნიშულია განცხადებაში.

28 თებერვალს ისრაელმა და აშშ-მა ირანზე ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა. თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.